A po e tolerojnë SHBA dhe BE Serbinë? Përgjigjet ish-ministri i Jashtëm kroat

Ish-ministri i Jashtëm kroat, Davor Ivo Stier komentoi në një intervistë për “Balkan Talks” në Euronews Albania qëndrimin e Bashkimit Evropian dhe Shteteve të Bashkuara të Amerikës ndaj Serbisë në raport me qasjen e kësaj të fundit ndaj Kosovës.

Sipas tij ideja nuk është te butësia apo vrazhdësia kundrejt Serbisë, por që dyert të qëndrojnë të hapura në mënyrë që Serbia të bëhet pjesë e demokracisë, edhe pse në këndvështrimin e Stier ky është një vendim që i takon Serbisë ta marrë.

“Serbia është e rrethuar nga vende anëtare në NATO, si dhe në BE. Është e rrethuar nga vetëm vende anëtare në NATO, ose në rastin e Kosovës dhe Bosnje Hercegovinës që s’janë akoma anëtare të NATO-s, por NATO është i pranishëm në këto vende. Pra, të mendojmë, të flasim apo të besojmë se është e mundur të kemi një pozicion të parreshtuar, nuk është reale. Nuk është e njëjta situatë siç ishte në Luftën e Ftohtë kur Jugosllavia, në fakt ishte mes dy blloqeve, Perëndimit dhe Lindjes.

Tani, siç thashë, Serbia është e rrethuar nga vende anëtare në NATO dhe prova më e mirë që kemi pasur kur ministri i jashtëm rus, Sergei Lavrov, shpalli një vizitë në Beograd. Por nuk e realizoi dot, nuk e përmbushi dot sepse vendet e NATO-s mbyllën hapësirën ajrore. Mendoj se kjo tregon grafikisht pozicionin e ri gjeopolitik, pa folur për tregtitë dhe investimet në Serbi që vijnë nga perëndimi. Pra, është një vendim që i takon Serbisë, autoriteteve serbe dhe tek e fundit, edhe popullit serb. Ata duhet ta marrin këtë vendim. S’është çështja a tregohen të butë apo të vrazhdë, është të mbahen dyert hapur, por sigurisht, e ka Serbia në dorë të vendosë ç’duan të bëjnë,” – u shpreh ish-ministri i Jashtëm kroat.

LEXONI GJITHASHTU:

• Ish-ministri komenton qasjen e Serbisë ndaj Perëndimit, ja ku po gabon
• Ish-ministri i Jashtëm kroat: Ja kur do ta njohë Serbia Kosovën