Aksidenti me 8 viktima: Arrestohen 2 persona, identifikohen 3 nga 7 emigrantët

Policia e Gjirokastrës ka arrestuar 2 persona, si dhe ka shpallur në kërkim një të tretë, në lidhje me aksidentin e rëndë në aksin  Këlcyrë-Përmet, ku humbën jetën 8 persona.

Personat e ndaluar dyshohet se kanë bashkëpunuar me drejtuesin e automjetit për transportimin drejt Shkodrës, kundrejt pagesës, të 7 emigrantëve të cilët synonin kalimin e paligjshëm të kufirit.

“Në vijim të veprimeve për këtë rast, u identifikuan 3 shtetasit e përfshirë në këtë veprimtari kriminale: A. Gj., 24 vjeç dhe R. D., 23 vjeç, të dy banues në Shkodër, të cilët u vunë në pranga në bashkëpunim me shërbimet e DVP Shkodër”, thueht në njoftimin e policisë.

Ndërkohë që në kërkim u shpall dhe një 23-vjeçar, me iniciale S. N.,  i cili dyshohet se është organizatori i kësaj veprimtarie kriminale.

Nga ana tjetër bëhet gjithahstu me dije se janë identifikuar 3 nga 7 emigrantët të cilët janë me origjinë nga Pakistani.

Vijon puna edhe për identifikimin e 4 emigrantëve të tjerë që kanë humbur jetën nga aksidenti.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

“Si rezultat i veprimeve hetimore të kryera për zbardhjen e rrethanave të aksidentit të ndodhur ditën e djeshme, në aksin rrugor “Këlcyrë-Përmet”, si pasojë e të cilit humbën jetën 8 shtetas, si dhe bazuar dhe në informacionet e siguruara nga inteligjenca policore, në kuadër të një hetimi proaktiv për zbardhjen e linjës së trafikimit dhe kontrabandimit të emigrantëve, është dokumentuar se 7 shtetasit nga Vendet e Treta që humbën jetën nga ky aksident po transportoheshin nga drejtuesi i këtij automjeti, nga kufiri grek drejt kufirit të Shkodrës, kundrejt pagesës, me qëllim kalimin e paligjshëm të kufirit. Nga këto veprime, të kryera nga strukturat e DVP Gjirokastër, në bashkëpunim me Sektorin e Trafiqeve në Departamentin e Policisë Kriminale në DPPSH dhe me strukturat e DVP Shkodër, në drejtimin e Prokurorisë së Gjirokastrës, dyshohet se drejtuesi i automjetit, shtetasi E. B., po bashkëpunonte me 3 shtetas të tjerë, për transportimin e 7 emigrantëve nga Pakistani, të moshave 28-32 vjeç, 3 prej të cilëve janë identifikuar”, thuhet në njoftimin e policisë.

LEXONI GJITHASHTU:

• “Policia u kërkoi të ndalonin”-Çipa jep detaje nga aksidenti me 8 viktima
• Aksidenti me 8 viktima, Avokati i Popullit: Emigrantët të trajtohen me dinjitet