Asim Vokshi betohet si anëtar i ri i Gjykatës Kushtetuese

Gjyqtari Asim Vokshi është betuar këtë të martë në Presidencë si anëtari i ri i Gjykatës Kushtetuese.

Ai do të zëvendësojë Holta Zaçajn, mandati i së cilës ka mbaruar që në muajin prill.

Gjykata e Lartë shpalli fitues Asim Vokshin për zëvendësimin e Zaçajt, por rezultati u kundërshtua nga kandidatja tjetër, Naureda Llagami.

Ajo pretendoi në Gjykatë Administrative dhe më pas në Kushtetuese se një votë e shpallur e pavlefshme i takonte asaj, dhe rrjedhimisht e bënte atë gjyqtare kushtetuese.

Betimi i tij largon nga Kushtetuesja Zaçajn, e cila mban edhe detyrën e kryetares së këtij institucioni.

Ikja e saj do të bëjë që gjykata të zgjedhë edhe një kryetar të ri, teksa përkohësisht drejtohet nga nënkryetarja Marsida Xhaferllari.

Asim Vokshi do të ketë një mandat të plotë 9-vjeçar. Vokshi priti pothuajse dy muaj që të betohej.

LEXONI GJITHASHTU:

• Përfundimi i mandatit si kryetare e Kushtetueses, Zaçaj bën bilancin e 3 viteve
• Emërimi i Asim Vokshit, Gjykata Kushtetuese rrëzon kërkesën e Naureda Llagamit