Baza e armëve dhe municioneve në Durrës, lihen në burg të arrestuarit

“Arrest në burg” vendosi gjykata e Durrësit për Hekuran Troplini dhe Emiliano Pashon, dy të arrestuarit për bazën në fshatin Shkallnur të Durrësit, ku ruhej arsenal armësh e municionesh në shërbim të grupeve kriminale.

Troplini 20 vjeç dhe Pasho,19 vjeç, të dy banues në fshatin Shkallnur u ndaluan të shtunën pas operacionit të policisë së Durrësit. Arrestimi i njërit prej tyre u filmua edhe nga droni i policisë, pasi ai tentoi që t’u largohej efektivëve. Veshur me xhup të zi e me kapuç në kokë, në tentativë për t’u arratisur, ai u fut nëpër ullishte duke vrapuar, por më pas u rrëzua dhe u arrestua nga policia.

Dy të rinjtë mbanin të fshehura armë zjarri luftarake kallashnikovë që më pas ua shisnin grupeve kriminale.

Brenda në bazë u gjetën 4 armë zjarri kallashnikovë me 20 krehra, qindra fishekë luftarak, 1 motomjet që shërbente për të lëvizur dhe transportuar armët e municionin, me qëllim shitjen,  63 700 lekë dhe një sasi lënde narkotike e dyshuar cannabis sativa.

LEXONI GJITHASHTU:

• Vodhën një biznes, 4 të mitur në hetim, njëri prej tyre mbante armë zjarri
• Zbulohet baza e grupeve kriminale në Sukth, i furnizonte me armë dhe municione