Në kuadër të fushatës elektorale, kryetari i Partisë Demokratike, Sali Berisha, zhvilloi këtë të premte një vizitë në qytetin e Krujës, ku takoi qytetarët dhe tregtarët në tregun e artizanëve. Teksa u prit me muzikë popullore, Berisha veshi një jelek me simbole kombëtare dhe vendosi në kokë një qeleshe.

Kryedemokrati u prezantoi tregtarëve pikat kryesore të ofertës së tij politike, duke u ndalur te shqetësimet ekonomike të tyre.

Berisha premtoi uljen e taksave dhe çmimit të energjisë elektrike për biznesin e vogël, gjithashtu ai tha se PD do të rrisë rrogat nëse vjen në pushtet.

“Do fitojmë. Dhe të jesh e sigurt që ne do bëjmë gjithçka për suksesin e biznesit. Do ulim energjinë në 6 lekë, e paguani 18 sot. Do përgjysmojmë tarifën e ujit. Do e ulim shumë tarifën për hapësirën publike. Do vendosim pensionin minimal 200 euro. Do vendosim rrogën minimale 500 euro,” tha Berisha.

Ai tha se nëse Partia Demorkatike vjen në pushtet do të bëjë gjithçka që të ktheje rininë që ka emigruar jashtë vendit.

“Një popull pa të rinj ka marrë fund… Do bëjmë gjithçka të kthehen ata që na ikën, duke u dhënë të drejtën e investimit 5 vite pa taksa. Do bëjmë gjithçka që çiftet e reja të jenë me tre fëmijë dhe fëmijën e tretë do e paguajë shteti nga lindja deri në 23 vjeç. Për fëmijën e parë dhe të dytë do japim bonuse 60 dhe 70 euro. Pra, e ke shumë të drejtë shqetësimin. Themelore është ajo që thoni ju,” tha Berisha.

Berisha e konsideroi ofertën e Partisë Demokratike si një platformë të fokusuar në zhvillimin ekonomik përmes nxitjes së prodhimit, përmirësimit të kushteve për bizneset e vogla dhe mbështetjes së drejtpërdrejtë për familjet shqiptare.

LEXONI GJITHASHTU:

• “Soros kundër Trump”- Fox News artikull për zgjedhjet e përgjithshme në Shqipëri
• Fushata e PD-së, Berisha: Do të rikthejmë projektin e ëndrrave për të rinjtë