Berisha sulmon drejtesinë: Kushtetuesja refuzoi t’i heqë mandatin Xhaçkës

Kryetari i Partisë Demokratike, Sali Berisha e cilëson vendim anti-kushtetues, atë të Gjykatës Kushtetuese, për mos heqjen e mandatit të deputetes, Olta Xhaçkës.

Në një bashkëbisedim me strukturat drejtuese të degëve 6, 13 dhe 16 në Tiranë, Berisha u shpreh se drejtësia është nën kontrollin e plotë të kryeministrit Edi Rama.

“Kurrë ndonjëherë përveç diktakturës hoxhiste, drejtësia nuk ka qenë nën një kontroll të tillë. Ju e patë Gjykatën Kushtetuese. Qëndruam 4 vite pa gjykatë, tani që është plotësuar merr vendimet më antikushtetuese, më antiligjore në tërë historinë e Gjykatës Kushtetuese. Gjykata Kushtetuese para kësaj, nuk është se nuk kishte të meta e defekte, por tre mandate të qeveritarëve të lartë që kishin përdorur pushtetin për tu pasuruar vetë, ua hoqi pa koment, duke patur edhe funksione e lidhje të forta, por diktimi i Kushtetutës ishte i atillë që nuk lejonte vendim tjetër.

Kurse kjo gjykatë, duke shkelmuar mbi të gjithë precedentët, mbi veten e saj dhe Kushtetutën refuzoi të heqë mandatin e Olta Xhaçkës. Një ministre që bëhet vetë dhe kunatën investitor strategjik, por që mbrohet për korrupsionin e saj nga Edi Rama dhe Gjykata Kushtetuese”, theksoi kryedemokrati.