Berisha takon Ambasadorin e Hungarisë në Shqipëri, çfarë diskutuan

Sali Berisha është takuar ditën e sotme me Ambasadorin e Hungarisë në Shqipëri Lorant Balla.

Në një postim që ka bërë në rrjetet sociale Berisha është shprehur se ata diskutuan gjerësisht mbi aktualitetin e zhvillimeve politike në vend.

Berisha ka bërë me dije se ka informuar ambasadorin mbi farsën e procesit gjyqësor të pashembullt në historinë e Shqipërisë, me të cilin Edi Rama kërkon t’u imponojë qytetarëve në mënyrën më antidemokratike se nga kush duhet të përfaqësohen si opozitë.

“Pavarësisht këtij konteksti i cili është në vijim të një serie aksionesh që kanë si qëllim asgjësimin e pluralizmit politik në vend, ashtu siç u dëshmua nga skandali McGonigal, e sigurova Ambasadorin mbi pjesëmarrjen e Partisë Demokratike në procesin zgjedhor të 14 majit, duke i garantuar se PD mbetet e angazhuar ndaj parimeve më të mira të garave elektorale, në respekt të votës së lirë dhe demokracisë qytetare.

Gjeta rastin ta falënderoj gjithashtu në emër të Partisë Demokratike, për të gjithë miqësinë e vyer historike që karakterizon marrëdhënien shqiptaro-hungareze, por dhe për rolin e veçantë të mikut dhe Kryeministrit Orban, në intensifikimin dhe nxitjen e bashkëpunimit mes dy vendeve tona. Ai ka qenë dhe mbetet një mbështetës i pakursyer i Partisë Demokratike dhe kauzave tona konservatore, në promovimin e vlerave më të drejta kombëtare dhe të familjes. Takimi ishte i hapur.”- shkruan ndër të tjera Berisha.

LEXONI GJITHASHTU: 

• Aksidenti tragjik, Greqia kërkon fonde nga BE për përmirësim të sigurisë hekurudhore
• Muzikoterapia në spitale, fëmijëve me tumor u ofrohen shërbime argëtuese