Dhuna ndaj futbollistëve të Skënderbeut, anulohet ndeshja në Fushë-Krujë

Federata e Futbollit njoftoi se ndeshja e javës së 14-të, Iliria–Skënderbeu, e programuar për t’u luajtur sot në orën 13:30 në stadiumin “Redi Maloku” në Fushë-Krujë, nuk është zhvilluar për shkak të shqetësimeve të raportuara lidhur me kushtet e sigurisë.

“Sipas informacioneve paraprake, në momentin e mbërritjes së ekipit të Skënderbeut në stadium, mësohet se ka pasur një incident mes lojtarëve dhe stafit të klubit Iliria, ku dyshohet se janë përfshirë edhe në konfrontime fizike.

Për shkak të këtyre rrethanave dhe problematikave të ngritura për sigurinë, është vendosur që ndeshja të mos luhet. Çështja do të shqyrtohet nga komisionet juridike të FSHF-së, të cilat do të marrin vendimin përfundimtar lidhur me këtë ndeshje”, bën me dije FSHF përmes një njoftimi për mediat.

Klubi i Futbollit Skënderbeu reagoi nëpërmjet një postimi në Facebook duke shprehur shqetësimin se lojtarët e klubit dhe trajneri Gjoka janë dhunuar nga Klubi i Futbollit Iliria.

“Dhunohen futbollistët e KF Skënderbeu dhe trajneri Gjoka nga stafi dhe futbollistët e KF Iliria përpara sesa të futen në dhomat e zhveshjes.

Ky nuk është futboll. Në këto kushte nuk mund të luhet futboll. Në Korçë mikpritja është kult, ndaj të njëjtën gjë presim dhe ne nga ekipet kundërshtare”, shkruhej në postimin e klubit.

LEXONI GJITHASHTU:

• Ekskluzive/ Presidenti i Ilirisë: S’pati dhunë ndaj Skënderbeut, debati u bë dramë
• Fushë-Krujë: Futbollistët e Ilirisë dhunojnë ata të Skënderbeut dhe trajnerin Gjoka
• Sulmohen gjyqtari 17-vjeçar gjatë ndeshjes Francica-Girifalco
• Sot ndeshja Shqipëri-Angli, rrugët që bllokohen