EMRI/ Tjetër ekstradim nga Dubai, drejt Tiranës Denis Brajoviç, alias Bajri

Policia e Shtetit njofton se këtë të mërkurë do të ekstradohet drejt Tiranës 37-vjeçari Denis Brajoviç, alias Bajri, i cili është ndaluar në Dubai, në kuadër të operacionit ndërkombëtar të koduar “The Wanted”.

Sipas Policisë, 37-vjeçari ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë i ka caktuar masën e sigurisë “Arrest në burg”, për veprat penale:

“Vrasja me paramendim”, kryer në formën e veçantë të bashkëpunimit, atë të grupit të strukturuar kriminal; “Prodhimi dhe mbajtja pa leje e armëve luftarake dhe municioneve”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; dhe “Sigurimi i kushteve dhe i mjeteve materiale për të kryer vrasje”, kryer në formën e veçantë të bashkëpunimit, atë të grupit të strukturuar kriminal.

37-vjeçari dyshohet si ekzekutori i vrasjes së Gjin Boriçit në Shkodër më 9 gusht të vitit 2020.

Sipas zbërthimit të bisedave në aplikacionin Sky, thuhet se Denis Bajroviç e kreu krimin me urdhër të Behar Bajrit dhe për llogari të Pëllumb Gjokës.

Vrasja mendohet se u krye me “klering” me kërkesë të Ervis Martinaj, ku ky i fundit do të ekzekutonte një person që Pëllumb Gjoka kishte konflikt në kryeqytet.

Ai është nisur me një avion të Turkish Airlines drejt Turqisë, ndërsa më pas do të hipet në një avion tjetër, ku do të sillet në Tiranë, ndërsa në lidhje me orën e mbërritjes, do të ketë një njoftim tjetër.

Njoftimi i plotë i Policisë së Shtetit

“Policia e Shtetit/Vijon operacioni policor ndërkombëtar i koduar “The Wanted”, për kapjen dhe ekstradimin e shtetasve të shpallur në kërkim ndërkombëtar.

Si rezultat i bashkëpunimit shumë të ngushtë të Interpol Tiranës me Interpol Abu Dhabi dhe me partnerët në Emiratet e Bashkuara Arabe, në kuadër të operacionit policor ndërkombëtar të koduar “The Wanted”, pritet që gjatë ditës së sotme të finalizohen procedurat për ekstradimin nga Dubai, Emiratet e Bashkuara Arabe, në Shqipëri, të shtetasit shqiptar Denis Brajoviç alias Bajri, 37 vjeç, shtetas i shpallur në kërkim ndërkombëtar, me rrezikshmëri shumë të lartë shoqërore, i akuzuar për një sërë veprash penale në fushën e krimeve kundër personit, të kryera në formën e grupit të strukturuar kriminal dhe për armëmbajtje pa leje.

Ky shtetas ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë i ka caktuar masën e sigurisë “Arrest në burg”, për veprat penale: “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal; “Prodhimi dhe mbajtja pa leje e armëve luftarake dhe municioneve”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; dhe “Sigurimi i kushteve dhe i mjeteve materiale për të kryer vrasje”, kryer në formën e veçantë të bashkëpunimit, atë të grupit të strukturuar kriminal.

Në lidhje me orën e mbërritjes, do të ketë një njoftim tjetër”, thuhet në njoftim.

LEXONI GJITHASHTU:

• Në kërkim pas “Metamorfozës”, arrestohet në Dubai Denis Bajroviç
• Dosja “Metamorfoza”, SPAK jep pretencën për Gjokën, Bajrin dhe Bistrin