Gazetari: Pa tifozët Kuq e Zi të Kosovës, stadiumi do ishte si varrezë

Gazetari Roland Qafoku tha në “Good Morning Albanians” se nëse në stadiume kur luan kombëtarja do të mungonin tifozët kuq e zi të Kosovës, stadiumi do kthehej në një varrezë.

Ai tha se tifozët shqiptarë në përgjithësi janë shumë të qetë. Qafoku komentoi gjithashtu edhe këndimin e “Mora fjalë” në stadium duke thënë se pavarësisht se ajo nuk ka lidhje me futbollin, zgjon te lojtarët ndjenjat kombëtare.

“Ne shqiptarët e Shqipërisë këtë rritjen patriotike në stadium e kemi nga shqiptarët e Kosovës. Ne jemi shumë të qetë në stadium.

Tifozët shqiptarë të Shqipërisë, kur luan Partizani- Tirana janë gati të kacafyten, por kur luan kombëtarja, pa tifozët kuq e zi, stadiumi ngjan si varrezë.

Tifozët kuq e zi të Kosovës, i kanë dhënë korin atij stadiumi dhe asaj kombëtareje. Ata këndojnë “Mora fjalë” ajo është këngë patriotike që nuk ka lidhje me futbollin, por tani është bërë një lloj trend dhe ne duhet ta pranojmë.

Kënga vërtetë s’ka lidhje me futbollin, por ata që luajnë kanë edhe ndjenja kombëtare”,-tha gazetari.