Gjashtë muaj nga tragjedia në Koçan, familjarët: Duhet të ketë drejtësi

Kanë kaluar gjashtë muaj nga nata e 16 marsit, kur në diskotekën “Puls” në Koçan të Maqedonisë së Veriut shpërtheu një zjarr i madh që mori jetën e 62 të rinjve dhe la të plagosur mbi 200 persona. Hetimet e deri tani kanë treguar se zjarri nisi nga mjete piroteknike që preknin materialet e ndezshme në tavan, ndërsa lokali kishte vetëm një derë hyrëse-dalëse dhe punonte pa leje të vlefshme.

Tragjedia zbuloi një varg shkeljesh institucionale, përfshirë mungesë kontrollesh, leje të falsifikuara dhe mosveprim të inspektorëve. Për këtë arsye, Prokuroria ngriti akuza ndaj 34 personave dhe tre kompanive, mes tyre ish-kryetarë të komunës, ish-ministra, funksionarë dhe inspektorë. Së fundmi, është akuzuar edhe pronari i kompanisë së sigurimit “Rubikon” për mosrespektim të standardeve të sigurisë.

Megjithatë, edhe pse aktakuza është dorëzuar në qershor, Gjykata Penale ende nuk ka caktuar seancë gjyqësore. Aktualisht po shqyrtohen rreth 40 ankesa dhe procedura gjyqësore mbetet në fazën e vlerësimit.

Familjarët e viktimave vazhdojnë të kërkojnë drejtësi. Çdo të shtunë ata organizojnë “Marshin e engjëjve” në Koçan, ndërsa së fundmi kanë shpallur edhe një thirrje për një tubim të heshtur në sheshin e Shkupit.

“Duhet të ketë drejtësi – Koçani nuk guxon të mbahet mend vetëm si qyteti i dhimbjes,” thonë ata.

LEXONI GJITHASHTU:

• Vdes një nga të plagosurit nga zjarri në Koçan, ministri Taravari jep lajmin e keq
• Tragjedia në Koçan, si është gjendja e 7 të lënduarve që po trajtohen në Spanjë