Gjykata e Lartë lë në fuqi dënimin me burgim të përjetshëm për Aldo Baren

Gjykata e Lartë la në fuqi dënimin me burgim të përjetshëm për ish-kreun e bandës së Lushnjes, Aldo Bare.

Në vitin 2017, Gjykata Kushtetuese konstatoi parregullsi në procesin ndaj Bares duke kthyer çështjen në Gjykatën e Lartë për shqyrtim.

Në dhomën e këshillimit, gjyqtarët Ilir Panda, Sokol Ngresi dhe Ervin Pupe kanë lënë në fuqi vendimin e vitit 2012 të Gjykatës së Apelit për krime të rënda, që mbyll në qeli përjetë Aldo Baren.

Aldo Bare u arrestua në Turqi në vitin 2006. Ndërsa kërkesa për ekstradimin e tij drejt Shqipërisë u pranua në fundin e vitit 2009, kur ish kreu i bandës kriminale të Lushnjës mbërriti me charter në Aeroportin ndërkombëtar ‘Nënë Tereza’ nën mbikëqyrjen e forcave të shumta të sigurisë.

Kush është Aldo Bare? 

Ish-speciali i forcave RENEA, Alfred Shkurti ose i njohur ndryshe si Aldo Bare, hyri në botën e krimit në vitin 1997, pasi atij i vrau vëllanë banda e Artur Dajës gjatë një përleshjeje me armë zjarri.

Pas vrasjes se Ramadan Shkurtit në Lushnjë, nisi të operonte banda e Aldo Bares së cilës drejtësia i numëron më shumë se njëzet vrasje, dhjetëra plagosje dhe vënie gjobash.

Kaq mjaftoi që vrasjet më pas të lidheshin zinxhir dhe natyrisht Bare nuk ishte i vetëm në gjithë këtë betejë personale.

Sipas prokurorisë, ish-speciali kishte arritur të rekrutonte në bandën e drejtuar prej tij Ilir Stërgun, Afrim Hoxhën, Arben e Enver Boriçin, Enver Dondollakun, të gjithë shokë, miq e të afërm të “kokës” së grupit, Aldo Bare dhe vëllait të tij Ramadan Shkurti.

Më pas kësaj bande iu bashkuan edhe: Maksim Çela, Erion Cici, Dritan Vila, Leonard Prifti, dhe shumë të rinj të tjerë.

Ndryshe nga të gjitha bandat që vepronin në vitin 1997 në vend, banda e Lushnjes, që u drejtua nga Aldo Bare, arriti të krijonte një komisariat të vetin në qytet, atë që mbahet mend edhe si “Komisariati Nr. 2”.

Mbretërimi i tij në qytet zgjati për gati 10 vjet, deri në vitin 2006 ku u godit edhe koka e bandës, Aldo Bare, i cili u arrestua në Maqedoni.

LEXONI GJITHASHTU: 

• Burg për rivalin e Aldo Bares, masa e sigurisë iu komunikua në Spitalin e Traumës
• Zbardhet dinamika, Policia jep detajet si u plagos rivali i bandës së Aldo Bares
• Kundërshtoi me dhunë efektivët në Tiranë, polici plagos rivalin e Aldo Bares