Investitori libanez për Review: Pse nuk u arrestua në 2016 ‘Rrumi i Shijakut’?

Përveç bregdetit në jug të vendit, edhe pronat e Gjirit të Lalzit kanë qenë të lakuara dhe të lakmuara prej vitesh, aq sa janë kryer edhe krime ndër më të rëndat për përvetësimin e tyre.

Një prej tyre ishte edhe ajo e dhunimit të biznesmenit libanez Fadi Mitri, në prani të bashkëshortes dhe vajzës së tij. Ngjarje e mbetur pa autor por që asokohe u dyshua se pas atij episodi ishte Aleksandër Laho.

Pas shpalljes në kërkim të Aleksandër Lahos (Rrumi i Shijakut) nga Prokuroria e Posaçme pak ditë më parë, Review ka kontaktuar biznesmenin libanez Fadi Mitri, për të mësuar se si ishte zgjidhur çështja e tij, por biznesmeni deklaroi se ishte i zhgënjyer nga organet e drejtësisë shqiptare.

Ai deklaroi se ishte i bindur që pas dhunës së ushtruar ndaj tij në datën 10 shtator të vitit 2016, qëndronte Aleksandër Laho me pseudonimin “Rrumi” i Shijakut, pasi gjatë dhunimit por edhe në raste të tjera, ai ja kishte thënë qartë që “duhej të largohej menjëherë nga prona e tij”.

Sipas Mitrit, pavarësisht se asokohe ai i ka vendosur në dispozicion të organeve të drejtësisë të gjithë dokumentacionin e nevojshëm ku pretendon se ka dorëzuar fakte të pakundërshtueshme për dhunuesit, drejtësia nuk ka bërë asgjë për të arrestuar fajtorët.

Prokuroria e liroi nga akuzat ‘Rrumin e Shijakut’ me arsyetimin se nuk kishte fakte. Sot biznesmeni libanez Fadi Mitrim ende vuan pasojat shëndetësore nga dhuna e ushtruar.

“Omnix Albania”, kompania e Mitrit do të investonte 280 milionë euro tek Gjiri i Lalzit. Por pas dhunimit fizik që iu bë presidentit të ‘Omnix’ Fadi Mitri, kompania u tërhoq nga investimi në Shqipëri.

Por çfarë bëhet me kompaninë ‘OMNIX Albania sh.p.k’, të Fadi Mitrit?

Ne mars të vitit 2021 biznesmeni libanez, i ka shitur të gjithë aksionet që posedonte në kompaninë ‘OMNIX Albania sh.p.k’.

Në 18 korrik të vitit 2022, kjo kompani ka fituar statusin e “investitorit strategjik me procedurë të veçantë” për projektin e investimit “Resort Turistik me vendndodhje në gjirin e Lalzit”.

https://youtu.be/gOUPjM88TbU

LEXONI GJITHASHTU: 

•  Rexhepi: Telefoni i ‘Rrumit’ ka dy vite në prokurori, pse nuk u ekzaminua më parë?
• Gazetari: Ngjarja ndaj biznesmenit libanez ka qenë e paralajmëruar
• Pronat, Rexhepi: Problem falsifikimi, të rritet siguria e dokumenteve kadastrale