Ish-Drejtoresha e Burgut të Grave: Gratë bëjnë burg për burrat e tyre

Ish-Drejtoresha e Burgut të Grave, Xhoi Jakaj thotë se ka pasur dhe ka raste, ku në institucionet e vuajtjes së dënimin, gratë vuajnë veprat penale për bashkëshortët apo të dashurit e tyre.

Në emisionin “Good Morning Albanians” në Euronews Albania, Jakaj u shpreh se bashkëshortët që janë në emigrim, u dërgojnë para grave të tyre, për t’i investuar në Shqipëri.

Jakaj nënvizoi se shumë vajza dhe gra janë përdoruese ose kultivuese të lëndëve narkotike dhe se bashkëshortët u thonë që të qëndrojnë në burg, pasi e kanë më të thjeshtë për t’i nxjerrë, nëse nuk e vuajnë vetë ata dënimin.

“Edhe unë kur kam qenë drejtuese, në përgjithësi, diskutoja me avokatë, por edhe me gjyqtarë e prokurorë që të jenë më fleksibël për gratë e dënuara, apo për gratë që janë në prag të marrjes së dënimit. Megjithatë, ata thonë se ligji është i barabartë për të gjithë. Duke qenë se burrat kanë emigruar shumë, dërgojnë një shumë të caktuar parash dhe i investojnë në emër të gruas, ose të motrës, mikeshës, qofshin para të ligjshme ose të paligjshme.

Dhe në kohën që isha unë drejtuese e institucionit, kishte shumë vajza dhe gra që ishin ose përdoruese ose kultivuese e hashashit, përdoreshin nga burrat ose të dashurit. Vazjat që kapeshin në atë periudhe me një sasi hashashi ose droge të çfarëdo lloji, i dashuri, ose bashkëshorti, ose i fejuari thoshte që rri aty brenda se të nxjerr më lehtë. Ka shumë gra në institucionin e vuajtjes së dënimit, që ato nuk e kanë veprën penale të tyre, vuajnë për dikë tjetër. Është kamuflazh dhe marrin fajin e burrit, të dashurit”, theksoi ajo.

LEXONI GJITHASHTU

• Kampionia e kickbox rrëfen momentin e vështirë: U bllokova në ring nga emocionet
• Lelo: 9 vite që merrem me kickbox, u fiksova nga filmat me arte marciale
• Eksperti ushqimor: Mishi i pulës në laborator është më i shijshëm sesa ai bio