“Kërkoj të mos jem unë gomari”- Ish-drejtori batuta në gjyqin për “Sterilizimin”

Në Gjykatën e Posaçme kundër Korrupsionit dhe Krimit të Organizuar ka nisur mbrojtja e të pandehurve në procesin gjyqësor për koncesionin e sterilizimit, pas shpalljes së pretencës nga SPAK. Dosja është ndarë nga ajo e ish-ministrit Ilir Beqaj, ndërsa të pandehurit e tjerë po gjykohen me gjykim të shkurtuar.

Gjatë seancës së sotme, një moment i pazakontë erdhi nga Saimir Kadiu, ish-drejtor ekonomik në Ministrinë e Shëndetësisë. Duke kërkuar pafajësinë e tij, Kadiu tha se nuk ka asnjë lidhje me akuzat për shpërdorim detyre që pretendon SPAK.

Në një moment, ai i kërkoi gjykatës të merrte në konsideratë një anekdotë:

“Lexova një anekdotë para disa ditësh. Mori flakë pylli dhe u mblodhën të gjitha kafshët. Thanë: po na dënon Zoti se kemi bërë shumë mëkate. Luani tha: ‘Unë kam ngrënë shumë prej jush’, ujku e dhelpra po ashtu. Pastaj i erdhi radha gomarit që tha: ‘Pashë një lëndinë me bar të gjelbër dhe shkova e hëngra.’ Të gjitha kafshët thanë: ‘Ky është gabimi më i rëndë!’ dhe e dënuan gomarin.”

I pyetur nga gjykata se pse e solli këtë shembull, Kadiu u përgjigj: “Kërkoj të mos jem unë gomari!”

Pas këtij momenti, ai theksoi se nuk ka pasur asnjë rol vendimmarrës në procedurat e koncesionit dhe se kërkon të dalë i pafajshëm.

LEXONI GJITHASHTU:

• Shtyhet gjyqi për dosjen e “Sterilizimit”, Ilir Beqaj refuzon avokatin kryesisht
• “Sterilizimi”- Ilir Beqja mungon në gjyq, shkak gjendja shëndetësore