Shtyhet gjyqi për dosjen e “Sterilizimit”, Ilir Beqaj refuzon avokatin kryesisht

Gjyqi për dosjen e “Sterilizimit” është shtyrë sërish për shkak të mungesës së avokatëve të disa të pandehurve, përfshirë avokatin e Ilir Beqajt, Ermal Yzeirajn, i cili kishte paraqitur një raport mjekësor.

Beqaj ishte vetë i pranishëm në seancë, ndërsa gjykata i kishte caktuar më herët një avokat kryesisht, të cilin ish-ministri i Shëndetësisë e refuzoi.

Beqaj kërkoi të përfaqsohej nga avokati Florian Bonjaku, duke qenë se Yzeiraj paraqiti raportin mjekësor.

Gjatë diskutimeve në seancë, ish-ministri iu drejtua avokatit të caktuar kryesisht: “Ti që paske lexuar 50 mijë faqe të dosjes time, hajde më tako te burgu, hajde një ditë në Durrës.”

Gjykata e shtyu seancën për dy javë, për t’i dhënë kohë Florian Bonjakut të njihet me aktet, ndërsa pezulloi afatet e paraburgimit gjatë kësaj kohe për të gjithë të pandehurit.

Të pranishëm në seancë ishin pothuajse të gjithë të pandehurit, mes të cilëve edhe Ilir Rrapaj dhe Klodian Rrapaj.