Kisha ortodokse ngushëllime për vdekjen e Papa Françeskut: Nxiti mirëkuptim mes feve

Kisha Ortodokse Autoqefale e Shqipërisë ka shprehur ngushëllimet për ndarjen nga jeta të Papa Françeskut.

Në një mesazh të shpërndarë në faqen zyrtare të kishës ortodokse në Facebook, vlerësohet kontributi dhe përpjekjet e Papa Françeskut për të nxitur një mirëkuptim më të madh ndërmjet Kishës Orthodhokse dhe asaj Katolike.

“Duke marrë pjesë në hidhërimin për fjetjen e Papës së Romës, Françeskut, dëshirojmë të shprehim ngushëllimet tona ndaj klerit dhe besimtarëve të Kishës Romano-Katolike.

Gjatë misionit të tij si prift, peshkop dhe Papë, ai gjithmonë tregoi një përkushtim të thellë ndaj shpalljes së Ungjillit në kontekste të ndryshme gjeografike dhe kulturore, veçanërisht përmes kujdesit të tij të sinqertë për të varfrit dhe të margjinalizuarit.

Veçanërisht vlerësojmë përpjekjet e tij të sinqerta për të nxitur një mirëkuptim më të madh ndërmjet Kishës Orthodhokse dhe asaj Katolike. Sjellim ndër mend fjalët e tij gjatë takimeve me përfaqësuesit e Kishës Orthodhokse: “Ecim së bashku si vëllezër në rrugën e mëshirës dhe të dashurisë”.

Me shpresën tek Krishti i Ngjallur i Cili: “…do të fshijë çdo lot nga sytë e tyre dhe nuk do të ketë më as vdekje, as zi, as vajtim, as dhimbje, sepse bota e mëparshme mori fund” (Zb. 21:4), lutemi që Zoti ynë, Ati i mëshirshëm, t’i japë prehje shpirtit të tij. I përjetshëm kujtimi!” thuhet në deklaratën e Kishës Ortodokse.

LEXONI GJITHASHTU:

• VIDEO| Momenti kur Vatikani njofton vdekjen e Papa Françeskut
• Berisha mban një minutë heshtje për Papa Françeskun: Njerëzimi humbi një kolos