Komisioni “Xhafaj” diskuton propozimet për sigurinë në gjykata

Ndryshime ligjore dhe një rezolutë për të garantuar sigurinë në gjykata dhe prokurori. Dy propozimet u hodhën për diskutim në komisionin e drejtuar nga Fatmir Xhafaj dhe për të cilat institucionet e drejtësisë si KLGJ-ës, KLP-ës dhe Prokuroria e Përgjithshme shprehën dakordësinë në parim.

“Jam skandalizuar nga ajo që kam parë”-është shprehur Xhafaj.

Me këtë konstatim pas këqyrjes nga afër të kushteve të sigurisë në gjykatat dhe prokuroritë e Shqipërisë, Fatmir Xhafaj ftoi institucionet e drejtësisë si KLGJ-ës, KLP-ës dhe Prokurorinë e Përgjithshme të përgatisin një paketë ndryshimesh ligjore dhe një rezolutë, ku secilit prej pushteteve gjyqësorit, ekzekutivit dhe legjislatorit t’i mirë-përcaktohen detyrimet.

Edhe pse qëllimi i mbledhjes ishte për sigurinë në gjykata, Prokuroria e Përgjithshme ngriti edhe shqetësimin e dëmtimit të dosjeve dhe materialeve të tjera shkresore në institucionet e hetimit.

Në dëgjesë ishin dhe përfaqësues të Ministrisë së Drejtësisë dhe të Brendshme. Në parim institucionet e drejtësisë i gjejnë të domosdoshme ndryshimet në ligj me objektiv kryesor kushtet e sigurisë në gjykata dhe prokurori.