Autoritetet shëndetësore në Maqedoninë e Veriut kanë konfirmuar zyrtarisht rastin e parë me coronavirus. E infektuar, rezulton një grua e sapo kthyer nga Italia.
Maqedonia e Veriut numëron mbi 80 mijë emigrantë në Itali, vend i prekur masivisht nga virusi vdekjeprurës.
Lajmi është bërë i ditur nga ministri i Shëndetësisë, Venko Filipche, ndërkohë që vetëm 24 orë më parë kishte bërë thirrje që të mos përhapej panik në rrjetet sociale për përhapjen e virusit.
Reagimi erdhi pasi në rrjetet sociale ishte përhapur lajmi se një paciente kishte rezultuar pozitive me coronavirus dhe bëhet fjalë për një person që kohët e fundit kishte vizituar Milanon.
Maqedonia e Veriut, bëhet kështu vendi i dytë në Ballkan që përfshihet nga virusi, pas rastit të parë të konfirmuar dhe nga autoritetet në Kroaci.
Gjithashtu, më parë dhe Greqia ka konfirmuar përmes Ministrisë së Shëndetësisë se një 38-vjeçare në Selanik, e cila kishte udhëtuar kohët e fundit në Itali, ka rezultuar pozitive gjatë testimit për coronavirus. Përveç saj, dhe personat që kanë qenë në kontakt me të kanë hyrë vullnetarisht në karantinë.
