Kupa e Karatesë në Vlorë, marrin pjesë 236 sportistë nga të gjitha trevat

Kupa e Karatesë në Vlorë, marrin pjesë 236 sportistë nga të gjitha trevat shqipfolëse

Më shumë se 230 sportistë të cilët përfaqësonin 26 klube sportive nga të gjitha trevat shqipfolëse morën pjesë në edicionin e 7-të të “Kupës Mbarëkombëtare të Karatesë” të zhvilluar në Vlorë.

Në kuadër edhe të 111 të pavarësisë së Shqipërisë aktiviteti u zhvillua në Pallatin e Sportit të qytetit bregdetar.

Përfaqësimi ishte i larmishëm, ku morën pjesë sportistë nga Shqipëria, Kosova, Maqedonia e Veriut, Mali i Zi apo edhe Lugina e Preshevës.

I kthyer tashmë në traditë, ky është vetëm fillimi i aktiviteteve në kuadër të Ditës së Pavarësisë.

Rëndësia e këtij aktiviteti është e madhe për shkak se marrin pjesë shumë sportistë, duke nisur nga më të vegjlit e për të përfunduar tek moshat e rritura.

Kryetari i bashkisë Ermal Dredha ka vlerësuar këtë aktivitet, i cili ka si qëllim jo vetëm garimin, por mbi të gjitha evidentimin e sportistëve elitarë në sportin e karatesë.

Gjatë aktivitetit është vlerësuar me certifikatë mirënjohje “Nderi i qarkut Vlorë” edhe Marin Meksi për kontributin e tij në sport dhe bodybuilding. Ai shprehu mirënjohjen e tij ndaj gjithë mbështetësve të këtij aktiviteti magjik të arteve marciale.

Aktivitete të tilla do të mbahen përgjatë gjithë muajit në kuadër të 111-vjetorit të Pavarësisë së Shqipërisë.

LEXONI GJITHASHTU:

• Man City eliminohet nga Kupa, fitore për Liverpool dhe ekipet e Lond
• Superkupa e Evropës/ Sevilla sfidon kampionët e Guardiolës, Greqia pret finalen