Kurti për Radoiçiç: Të burgoset si Pablo Escobar, dakordësi me Vuçiç

Mes Aleksandër Vuçiç dhe Milan Radoiçiç që kryesoi sulmin e armatosur në veri të Kosovës, sipas kryeministrit Albin Kurti ka një ujdi të ngjashme me atë që Pablo Escobar ka bërë me Presidentin e Kolumbisë.

Ky është shpjegimi që i jep kryeministri Albin Kurti arrestimit e me pas lirimit të Milan Radoiçiç nga autoritetet serbe për ngjarjen e Banjskës, gjatë një interviste të dhënë për një media malazeze.

“Arrestimi dhe lirimi i Radoiçiçit të kujton marrëveshjen e Pablo Escobarit me presidentin e Kolumbisë. Escobar në fakt, do të pranonte të shkonte në burg me kusht që të vendosej në burgun e tij, të ndërtuar në mënyrë të pavarur, në të cilin do të kontrollonte ai komandantët dhe jo anasjelltas. Gjoja do ta vuante dënimin atje,” – u shpreh Kurti.

Paralelizmat Kurti i vazhdon edhe më tej, tek marrëdhënia mes presidentit rus Vladimir Putin dhe kreut të grupit mecernar Wagner, Yevgeny Prigozhin, imitim i të cilit jo rrallë herë është cilësuar edhe grupi i drejtuar prej Milan Radoiçiç.

“Marrëdhënia mes Vuçiçit dhe Radoiçiçit nuk është origjinale. E kemi parë shumë herë më parë. Putini i vogël në Beograd duhet të ketë Prigozhinin e tij të vogël në Kopaonik. Ose, nëse kthehemi pak më tej në të kaluarën, del një paralele, Sloba i ri në Beograd ka Arkanin e tij të ri në Kosovë,” – deklaroi kryeministri i Kosovës.

Kurti tha se qëllimi i këtij grupi të armatosur, të financuar dhe mbështetur nga Beogradi, ishte aneksimi i veriut të Kosovës, ndërsa përsëriti edhe njëherë kërkesën ndaj ndërkombëtarëve për të sanksionuar Serbinë si agresore të këtij sulmi.

LEXONI GJITHASHTU:

• Kurti: “Prigozhini” i vogël i Vuçiçit duhet të ekstradohet në Kosovë
• Lajçak i përgjigjet Kurtit: Kur s’të pëlqen mesazhi, përpiqesh të sulmosh lajmëtarin