Ligji për qeverinë teknike përplas partitë në RMV

Mazhoranca në Maqedoninë e Veriut ka refuzuar propozimin e opozitës për heqjen e Qeverisë teknike 100 ditë para zgjedhjeve parlamentare.

Ligji aktual parashikon që para zgjedhjeve kryeministri jep dorëheqje dhe i hapë rrugën krijimit të qeverisë teknike.

Në Qeverinë teknike opozitës i takojnë Ministri i Brendshëm dhe Ministri i Punës dhe Politikës Sociale, si dhe 3 zëvendës ministra me të drejtë vetoje.

Partia më e madhe opozitare VMRO-DPMNE vendosi të heq dorë nga këto privilegje, duke e konsideruar modelin jofunksional.

“Besojmë se ky model do të duhej të tërhiqet, për një arsye, sepse jo-funksionalitetin e kësaj zgjidhjeje ligjore e kemi pasur mundësinë ta shohim në disa raste”, tha Nikolla Miceski nga VMRO-DPMNE.

Megjithatë vetëm 32 deputetë të VMRO-DPMNE-së e përkrahën heqjen e Qeverisë teknike, ndërsa 55 deputetë të shumicës parlamentare votuan kundër.

Konsensus mes partive

Kryeparlamentari Talat Xhaferi tha se ndryshimet e tilla mund të bëhen vetëm me konsensus mes të gjitha partive politike.

“Ai ligj ka ardhur në formë konensuale dhe në mënyrë konsensuale duhet të dorëzohet në Kuvend, atëherë kur do ta nënshkruajnë koordinatorët e grupeve më të mëdha parlamentare”, tha Xhaferi.

Kryetari i VMRO-DPMNE-së Hristijan Mickoski e ka quajtur veprim frikacakësh refuzimin e këtyre ndryshimeve nga pushteti. Sipas tij madje partitë e pushtetit po shkelin edhe marrëveshjen që kishin për heqjen e Qeverisë teknike.

“Kishim marrëveshje, por siç ndodh zakonisht, aq vlen marrëveshja. Ky është mentaliteti i këtyre njerëzve. Jepet dora, flitet një gjë në tavolinë, pastaj më vonë flitet gjë tjetër. Më vjen keq që edhe Kovaçevski vazhdon të sillet siç sillej mentori i tij”, u shpreh Mickoski.

Ligji për Qeverinë teknike u dakordua në bisedimet politike të ndërmjetësuara nga Bashkimi Evropian në vitin 2016, si rezultat i krizës politike pas publikimit të përgjimeve për Qeverinë e Nikolla Gruevskit.

Ky model u praktikua dy herë, një herë para zgjedhjeve të vitit 2016 kur Nikolla Gruevski u tërhoq nga detyra e kryeministrit para zgjedhjeve. Një herë tjetër në zgjedhjet e vitit 2020 kur Zoran Zaev i la postin bashkë partiakut Oliver Spasovski.