Lobimi në SHBA, Meta mbërrin në SPAK, nis marrja në pyetje

Ish-Presidenti i Republikës, Ilir Meta, ka mbërritur në ambientet e SPAK nga qelia e tij Nr.5 e burgut “313”, përmes tunelit që lidh këtë institucion me Strukturën e Posaçme Kundër Korrupsionit dhe Krimit të Organizuarme.

Meta është thirrur për të dhënë dëshminë e tij si person në hetim në lidhje me lobimin e LSI në SHBA.

Siç parashikohet nga procedurat ligjore, Meta është shoqëruar në SPAK në prani të avokatit Genc Gjokutaj, për t’u pyetur nga prokurorët që po hetojnë rastin.

Dje, ishin thirrur edhe disa figura të tjera të afërta me ish-Presidentin. Mes të thirrurve për t’u marrë në pyetje ishin bashkëshortja e tij, Monika Kryemadhi, e cila është aktualisht në proces divorci, nëna e saj, Fatime Kryemadhi, dhe bashkëpunëtorja e ngushtë e çiftit, Ema Çoku.

Sipas informacioneve, as Monika, as Fatime Kryemadhi dhe as Ema Çoku nuk kanë pranuar të japin asnjë deklaratë përpara prokurorëve.

Kujtojmë që ish-Presidenti u arrestua më 21 tetor 2024 në ish-sheshin “Shqiponja” dhe ndodhet në qeli në masën e sigurimit “Arrest me burg”.

LEXONI GJITHASHTU:

• Avokati: Meta u pyet për lobimin në SHBA, kërkoi të fliste me mediat, nuk iu lejua
• Marrja në pyetje e Ilir Metës, paraqitet në SPAK avokati i tij Genc Gjokutaj
• Prej 21 tetorit në burg, Meta lë sot qelinë për t’u paraqitur në SPAK
• “Mund ta shpik palestrën edhe në 15 m2″, Meta flet për Euronews nga burgu 313
• “O Sali, o hero”- Berisha paraqitet në SPAK i rrethuar nga mbështetësit