Man City fiton pa probleme, avancojnë më tej në kupë dhe Arsenal e Tottenham

Skuadrat e Premier League nuk kanë hasur vështirësi në Kupën e Ligës, aty ku triumf regjistruan Arsenali, Manchester City, Newcastle e Tottenham. Këto dy të fundit përballen me njëri-tjetrin në fazën tjetër. Me shumë ndryshime në formacion, skuadra e Pep Guardiolës mori një fitore pa shumë mundim përballë Huddersfieldit, me golat e shënuar nga Foden dhe Savinho. Pavarësisht ndryshimeve në rreshtim, qytetarët nuk u rrezikuan për asnjë moment nga kundërshtari.

Arsenali luajti në transfertë me Port Vale, skuadër shumë larg kapaciteteve të kundërshtarit. Topçinjtë realizuan dy herë me Eze dhe Trossard. Newcastle mposhti 4-1 Bradford Cityn dhe Tottenhami likuidoi Doncasterin 3-0, ndërsa fituesit përballen me njëri-tjetrin në fazën tjetër.

Duelet e fazës tjetër të kupës luhen më 29 tetor, aty ku Arsenali sfidohet nga Brightoni, Liverpooli nga fituesit e Superkupës Crystal Palace dhe Chelsea nga Wolves. Kundërshtari më i lehtë në letër është Swansea që luan ndaj Man Cityt, por edhe Grimsby që sfidon Brentfordin, sidomos pas atij eliminimi që i bëri Manchester United po në këtë kompeticion.