Mbajti të fshehur nipin për rreth 1 javë, arrestohet gjyshja në Durrës

Ka marrë fund pas një jave rrëmbimi i 3-vjeçarit në Durrës. Gjyshja e tij, Bahrije Gjuni, e ka dorëzuar këtë të shtunë në polici minorenin, i cili u mor pa lejen e së ëmës.

Burime bëjnë se pas dorëzimit të të miturit në polici, gjyshja është arrestuar nga uniformat blu.

Gjatë kësaj kohe i mituri është mbajtur në Kukës dhe Has, tek persona të njohur të familjes. Pas daljes në media të lajmit, mësohet ditët e fundit se gjyshja e ka mbajtur nipin nëpër hotele në Tiranë.

Pasi mori në dorëzim të birin, e ëma u shpreh e emocionuar në dalje të komisariatit të Durrësit dhe shprehu falenderime për punën e uniformave blu.

Ngjarja ka ndodhur më 16 prill, ka qenë e ëma e të miturit ajo e cila ka bërë denoncimin në polici, ku tha se 3-vjeçari është marrë nga prindërit e bashkëshortit të ndjerë.

Gjykata e Durrësit dha të premten masën e sigurisë “Arrest me burg” për Rexhep Gjuni gjyshin e 3-vjeçarit.

“Arrest me burg” u caktua dhe për Arben Selajn, vëllanë e bashkëshortes së Rexhep Gjunit, i cili dyshohet se e ka ndihmuar këtë të fundit në fshehjen e fëmijës.

EXONI GJITHASHTU:

• Zhdukja e fëmijës 3-vjeç në Durrës, reagon policia
• Zhdukja e 3-vjeçarit në Durrës, gjykata jep masat e sigurisë për gjyshin dhe kunatin