Mësimi me turne, prindërit nuk kanë mundësi t’i shoqërojnë fëmijët për në shkollë

Është java e dytë e shkollës dhe mësimi me turne vijon të mbetet një problem për prindërit, pasi shumë prej tyre janë në punë dhe e kanë të pamundur t’i dërgojnë dhe marrin fëmijët nga shkolla.

“Me pak vështirësi se jemi në punë i sjellim vetë, në mëngjes vij vetë mbas dite e sjell furgoni, çuni madh vjen vetë ikën vetë. Të hallakatur jemi për Zotin, nuk kemi çfarë të bëjmë”, shprehet një prind.

Ata kanë gjetur zgjidhje tek gjyshërit, ndërsa të tjerë detyrohen t’i lënë fëmijët të shkojnë vetëm në shkollë.

“Unë vij i marr, nuk kanë mundësi prindërit, janë në punë… deri në fund me do i marrim”, shprehet një i moshuar.

“Më pëlqen të vij dhe vet pasi prindërit ndodh që janë dhe në punë”, tha një tjetër.

Grumbullimet e prindërve përpara derës së shkollës janë kthyer në një shqetësim më vete në kushtet pandemisë dhe distancimit fizik. Të tjerë detyrohen të lënë makina në rrugë, duke sjell bllokim të trafikut, duke nxituar të marrin fëmijët.