Muzikantët protestojnë në RMV, kërkojnë rikthimin në punë dhe lejimin e eventeve

Punonjësit në sektorin e muzikës protestuan sot para Qeverisë së Maqedonisë së Veriut, pasi sektori i tyre nuk u përfshi në lehtësimin e masave anti-Covid. Ata kërkojnë kthim në punë dhe shfuqizim të ndalesës për shfaqjet nëpër objektet hotelierike.

“Vërejtjet tona konkrete janë pas vendimit të fundit ku dasmat lejohen, ndërsa evente tjera jo, për ne është skajshmërisht diskriminuese dhe jo-logjike. Pasiqë protokolle për evente të vogla ne kemi dorëzuar tek ministria e kulturës dhe komisioni për sëmundje infektive që para një viti. Protokollet i kemi kopjuar nga vendet tjera evropiane dhe janë kualitative, nuk e dijmë se përse nuk janë shqyrtuar dhe asnjëherë nuk kemi marrë përgjigje”, u shpreh kryetar i Shoqatës “Muzikë tani”.

Ata kërkojnë takim me autoritetet që të gjendet një zgjidhje për kërkesat e tyre.

 “Nuk mund të ulen gjashtë persona në tavolinë, të flasin me gojën plot, ose të gjithë prekin në sallatën e njëjtë dhe kjo të mos paraqet problem për komisionin për sëmundje infektive, ndërsa një muzikant t’i bie violinës në një qoshe, të paraqet kërcënim të tmerrshëm për vizituesit e objekteve hotelierike ose DJ”, Xhon Ilija, pjesë e Shoqatës, “Muzikë tani”.

Ata thonë se kjo është veprimtaria e vetme e ndaluar në masën 100%.

Kjo shoqatë me 440 anëtarë dhe me mbështetjen e mbi 1600 anëtarëve në shoqata tjera thonë se nuk do të ndalojnë me protestat deri në realizimin e kërkesave të tyre.