Qindra nxënës e studentë të 15 shkollave dhe universitetit të Durrësit u bënë bashkë në një marshim sensibilizues për mbrojtjen e mjedisit.

Ata morën me vete thasët me mbetje plastike, të cilat do t’i dërgojnë për riciklim dhe paratë e mbledhura do t’i përdorin për blerjen e mjeteve shkollore.

“Është shumë e rëndësishme që edukata qytetare dhe mjedisore të fillojë nga shkolla. Sot e nisëm me shkollën ‘Shaqe Mazrreku’ dhe 14 shkolla të tjera dhe universitetin për të thënë, që këto shishe plastike që ne i kemi në shtëpitë tona, ne mund t’i riciklojmë dhe t’i kthejmë në mjete shkollore”, tha Laura Gjyli, koordinatore e lëvizjes.

Sensibilizimi qytetar është qëllimi kryesor dhe koordinatorja e lëvizjes pohon, se për të arritur këtë tërësisht do të duhet kohë.

“Sigurisht do të duhet pak kohë, që qytetarët të zgjohen, por mendojmë që duke nisur nga klasat e para e deri në universitet, ne mendojmë se mund të bëjmë shumë më tepër”, tha Gjyli.

Dhe për t’ia arritur kësaj “mbrojtësit” e mjedisit po punojnë.

Prej vitesh, mësues dhe drejtues të shkollave të Durrësit i janë bashkuar, për të përcjellë mesazhin e Edukatës Qytetare dhe Mjedisore jo vetëm tek nxënësit, por edhe më gjerë.

“Jemi shumë të lumtur që marrim pjesë në këtë aktivitet, pasi riciklimi i mbetjeve plastike shërben për mjete shkollore në shkollat tona”, tha mësuesja Marsida Mezja.

Prej më shumë se 3 vitesh, lëvizja “River Clean Up” ka ndërmarrë me dhjetëra aksione pastrimi në lumin Ishëm, lumi më i ndotur në Evropë nga mbetjet plastike.

LEXONI GJITHASHTU:

• Ekipet e pastrimit të qytetit, profesioni i vështirë që nis punën pas mesnate
• Dita botërore e pastrimit, aksion vullnetar i qytetarëve në Korçë