“Nuk të njeh askush”- Bardhi përplaset me Malajn, ministri: Gjumë flini ju

Në seancën plenare të kësaj të enjteje, një përplasje mes ministrit të Financave, Petrit Malaj, dhe kreut të Grupit Parlamentar të Partisë Demokratike, Gazment Bardhi, shkaktoi tensione të forta. Përplasja erdhi pasi Bardhi e akuzoi ministrin se ishte vonuar për të marrë pjesë në seancën, duke theksuar se ai duhej të ishte aty që në orën 08:00.

“Zoti Bardhi gjumë jeni mësuar të flini ju, se keni vite që flini gjumë,” iu drejtua Malaj Bardhit.

Nga ana tjetër, Bardhi e akuzoi ministrin se nuk bënte asnjë punë dhe nuk e ndiqte axhendën parlamentare, duke shtuar se Malaj nuk ishte njohur nga askush dhe se nuk kishte angazhim serioz.

“S’je gjëkundi, nuk të njeh askush dhe nuk bën asnjë punë. Je aty se të ka rekomanduar krimi i organizuar, je për të menaxhuar paratë e buxhetit të shtetit për t’ia çuar me tendera e koncesione krimit të organizuar. Je aty si ushtar i Ramës për të firmosur atë që të urdhëron Rama dhe krimi i organizuar”, tha Bardhi.

Ministri Malaj  iu përgjigj duke thënë se angazhimi i tij në punë është i dokumentuar dhe i dukshëm.

“Nëse do t’i referohesh medias, do të shikosh angazhimin tim që në mëngjes herët, se ku kam qenë i angazhuar dhe për çfarë,” u shpreh Malaj.

LEXONI GJITHASHTU:

• Përjashtohet nga seanca plenare Agron Shehaj, bllokoi foltoren për disa minuta
• Shehaj i kërkoi intepelancë, Balluku: Kam qenë dy herë në Kuvend, ti s’ke ardhur