Tashmë prej 16 vitesh në Maliq organizohet panairi i embëlsirave, prodhimeve bujqësore e blegtorale dhe bletërritësve që shpalosin produktet e bletëve. Organizimi ka për qëllim ruajtjen e traditës së gatimeve tradicionale, të cilat e kanë bërë zonën mjaft të frekuentuar nga turistët e huaj.

Kryetari i Bashkisë Maliq tregoi se shumë shpejt do të ketë një linjë të prodhimit të Zahireve dhe rikthimin e tregut të fruta perimeve në fshatin Pirg, ku fermerët do të kenë mundësi të tregtojnë dhe lidhin kontrata me grumbullues të mëdhenj në kushte të favorshme për ta.

Panairit ju bashkua edhe kryetari i bashkisë së Korinthit në Greqi, i cili shoqërohej edhe nga një grup artistik. Për të ky udhëtim do të shërbejë për të lidhur marrëdhënie për eksportimin e produkteve bio shqiptare në shtetin helen.

“Unë vij për të disatin vit rradhazi në Maliq, më tepër sesa për këngë e valle vijmë për të marrë ushqimet bio e për ti çuar drejt bizneseve greke. Ne fakt ne kemi arritur një bashkëpunim me bashkinë e Maliqit dhe po punojmë që të krijojmë ura bashkëpunimi që produktet e kësaj zone të vijnë në bashkinë tonë dhe të shiten, sepse për të qenë të sinqertë, janë produkte fantastike”, tha Nikolao Stavrelis, kryetari i Bashkisë së Korinthit.

Fusha e Maliqit është fusha e dytë me e madhe në vend, fermerët e kësaj fushe kanë rendimente të larta në kultura të ndryshme bujqësore duke nisur me grurin, misrin, qepën dhe pataten.

LEXONI GJITHASHTU:

• Panairi kombëtar i artizanëve, mblidhen në Gjirokastër mjeshtërit e traditës
• “Kozarja në festë”, panairi i produkteve blegtorale dhe bujqësore bashkon fermerët