“Shën Kozmai, murgu që u bë shenjtor!”- ishte dokumentari i radhës i sjellë nga gazetari Andrea Danglli në Euronews Albania.
Ai ka realizuar një jetëpërshkrim të murgut ortodoks, mes bekimeve apo mallkimeve, polemikave apo debateve, të shkuarës dhe të tashmes.
I njohur si Kozma Etoliani, ai la familjen e varfër në një fshat të vogël të Epirit të Jugut, dhe ju dorëzua studimeve në Malin e shenjtë Athos ku ndoqi edukimin për teologji.
Mandej, fati e deshi që të veshë pelerinën e murgut për t’u nisur me urdhër të patriarkanës Ekumenike të Konstandinopojës drejt misioneve disa vjeccare në Turqi, Maqedoni, Greqi dhe Shqipëri ku u vendos në fshatin Kolkondas bri Libofshës së Fierit.
Ky vend mori emrin Kolkondasi i Shën Kozmait ashtu siç edhe murgu mori emrin Shën Kozmai i Kolkondasit.
Megjithëse kanë kaluar tre shekuj nga ekzistenca e tij fizike, për këtë vend ai duket se nuk ka ikur kurrë, madje as atëherë kur besimi tek feja konsiderohej si mëkati më i madh për pushtetin komunist.
Gazetari Andrea Danglli ka sjellë zërin e banorëve të zonës si dhe ka bërë udhëtimin historik të Manastirit të Shën Kozmait ndërtuar nga sundimtari Ali Pashë Tepelena.
Në një bisedë me murgun e këtij manastiri Andrea Lekbello, ai zbuloi disa nga të pathënat rreth Shën Kozmait.
Sipas murgut, nderimi ndaj Shën Kozmait nuk u pengua dot plotësisht as në Komunizëm.
“Ka një profeci të Shën Kozmait me gojë por që nuk është e shkruar, që thotë një ditë lumi do kalojë në shtëpinë time. Lumi doli diku mes viteve ’54-’58, prishi Kishën e Shën Mërisë, mbuloi gjysmën e parë të Kishës së Shën Kozmait dhe komplet katin e parë të të gjithë Manastirit. Gjatë periudhës së sistemit komunist Manastiri ka qenë i mbyllur. Pavarësisht se ishte i mbyllur dhe i braktisur, besimtarë të krishterë dhe jo të krishterë në zona, sa herë që kishin probleme shëndetësore, vinin dhe hidhnin një lekë te një kuti ku ishte dhe varri i Shën Kozmait. Mund të ketë pasur dhe persona që mund ta kenë pësuar në kohën e komunizmit që kryenin këto ritual”, tha murgu.
Për më tepër mbi të thënat dhe të pathënat rreth tij, ndiqni dokumentarin e gazetarit Andrea Danglli.
LEXONI GJITHASHTU:
- Frika nga një sulm terrorist, mbyllet Katedralja e Këlnit
- Kaos në spitalin e Gazës, fluks të plagosurish nga sulmi në kampin e refugjatëve
