Protesta në Vorë, banorët kundër projektit për rrugën dytësore

Disa banorë të Vorës dolën të premten në protestë kundër projektit që sapo ka nisur të zbatohet për ndërtimin e rrugës dytësore drejt Marikajt.

Sipas tyre, ky projekt është ndërmarrë pa u konsultuar më parë me ta dhe do të dëmtojë qendrën dhe lulishten e qytetit, aktivitetin e bizneseve të zonës si dhe do të prekë disa objekte që mund të shemben.

Banorët kërkuan anulimin e projektit, pasi në rast të kundërt ata paralajmërojnë përplasje.

“Do përplasemi me kryetarin që kanë sjellë dhe firmën që do të bëjë punimet, se nuk kemi çfarë të bëjmë. Ka mbetur vetëm të ikim dhe ne, se rinia ka ikur gjithë”, thotë një banor.

“T’i thërrasë banorët e Vorës ose Këshillin Bashkiak. Nuk kemi marrë asnjë njoftim, vetëm kemi parë punëtorët e firmës”, shprehet një biznesmen i prekur nga plani.

Policia ishte e pranishme gjatë protestës, por uniformat blu nuk ndërhynë për të shpërndarë qytetarët, edhe pse tubimet në këtë periudhë pandemie janë të ndaluara.