Protestë e transportuesve në RMV, kërkojnë uljen e çmimit të karburantit

Mbi 200 maunë, furgonë e  autobusë protestuan para Qeverisë me bori, të revoltuar ndaj vendimit për rritjen e akcizës së çmimit të karburantit për tre denarë. Transportuesit të organizuar në shoqatën “Makam Trans” i ranë borive në shenjë paralajmërimi për protestë tjetër nëse çmimi i karburantit nuk bie.

“Kërkojmë që shpenzimet e regjistrimit të automjeteve të shtyhen, dhe kemi kërkesë edhe për kthimin e mjeteve që i paguajmë për rrugët, pasi tani nuk i shfrytëzojmë, të ketë mundësi për kompensim. TVSH-të e të gjitha kompanive të transportit të kthehen menjëherë sepse në këtë mënyrë nuk do të kemi nevojë të marrim kredi, por do t’i përdorim paratë tona”, deklaroi Biljana Muratovska, përfaqësuese e “Makam trans”.

Por Qeveria dhe ministri i transportit mendojnë ndryshe. Ministri i transportit Goran Sugarevski thotë se Maqedonia i ka çmimet më të ulëta të derivateve në rajon dhe se kështu nuk iu bën ndonjë dallim të madh transportuesve.  

“Rritja e akcizës është për shkak të solidaritetit, për shkak të qytetarëve dhe nuk përbën ngarkesë shtesë. Çmimi i naftës, për momentin është më i ulët për 20 denarë krahasuar me janarin dhe shkurtin dhe me uljen e sotme është më e ulët në 20 vitet e fundit. Një argument tjetër i rëndësishëm është se çmimi I naftës tek ne është më i ulëti krahasuar me vendet e rajonit”, deklaroi Goran Sugarevski, Ministër i Transportit 

Transportuesit thonë se puna u është reduktuar për 70%, prandaj edhe i propozojnë Qeverisë që ta mbushë buxhetin nëpërmjet tatimit progresiv, e jo nëpërmjet rritjes së çmimit për karburant. Në shoqatën “Makam Trans” bëjnë pjesë 1500 transportues të mallrave.