Në kuadër të aktiviteteve për Epopenë e Ushtrisë Çlirimtare të Kosovës, po përkujtohen aktet heroike të UÇK-së, me një fokus të veçantë në Prekaz.

Gjatë datave 5, 6 dhe 7 mars, nderohet sakrifica e familjes Jashari dhe të gjithë atyre që dhanë jetën për lirinë e Kosovës.

Në lidhje me këtë Euronews Albania realizoi një intervistë me Adnan Merovcin, një bashkëpunëtor i Rugovës dhe gazetar i cili mundësoi një video ekskluzive ku Ibrahim Rugova, presidenti historik i Kosovës, bënte thirrje për ndërprerjen e sulmeve serbe ndaj popullatës civile në Kosovë.

Permbajtja e videos është nga një konferencë shtypi ku Rugova apelonte për ndihmën e komunitetit ndërkombëtar, duke iu drejtuar Presidentit amerikan Bill Clinton dhe liderëve evropianë që të ndërhynin dhe të ndalonin masakrat serbe në Kosovë.

“Sulmi i djeshëm i forcave serbe në Drenicë ndaj popullatës civile shkaktoi rreth 20 viktima të tjera. Sipas informacioneve të fundit, sulmet vazhdojnë në fshatin Prekaz. Kjo është një tjetër masakër e kryer mbi popullsinë civile të Kosovës. Sulmet ndaj Drenicës janë pjesë e një programi të spastrimit etnik të Kosovës. Kërkojmë ndërprerjen urgjente të këtyre sulmeve dhe bëjmë thirrje për SHBA dhe BE që të ndërmarrin hapa të shpejtë për të ndihmuar në këtë situatë. Përsërisim apelin drejtuar Presidentit Clinton dhe Kryeministrit Blair, që të bëjnë gjithçka që është e mundur për të shpëtuar popullin e Kosovës”, thoshte Rugova në apel, duke përsëritur kërkesën për ndërhyrjen e liderëve ndërkombëtarë.

LEXONI GJITHASHTU:

• Fjalët e fundit të Adem Jasharit… rrëfehet Adnan Merovci
• Departamenti amerikan i Mbrojtjes: Ska ndryshime në pozicionimin e forcave në Kosovë