Raporti i KE-së për RMV-në, politika beson në hapjen e negociatave

Raporti pozitiv i Komisionit Evropian për punën e Maqedonisë së Veriut në procesin e reformave, ka shkaktuar frymë pozitive në opizionin publik dhe bindje se Këshilli Evropian do të pranojë rekomandimin e Komisionit Evropian për nisjen e negociatave për anëtarësim të Maqedonisë së Veriut në BE.

Zëvendës kryeministri për çështje evropiane Bujar Osmani, u tha mediave se Maqedonia e Veriut meriton notën pozitive për shkak të numrit të madh të reformave, sidomos në gjyqësor.

“Edhe njëherë konfirmohet qartë rekomandimi për fillimin e negociatave me Bashkimin Evropian. Në raport qartë theksohet përcaktimi reformues i vendit në fusha të cilat Këshilli Evropian i kishte përcaktuar si prioritare. Gjyqësori, shërbimet e inteligjencës, administrata dhe lufta kundër krimit të organizuar dhe korrupsionit”, theksoi Bujar Osmani, zëvendës kryeministër i RMV-së.

Osmani shprehet i bindur se shumë shpejt Maqedonia e Veriut do të marrë edhe datën për nisjen e negociatave.

“Qartë po hapet rruga për vendim për fillimin e bisedimeve në mars të vitit 2020”, shtoi Osmani.

Nga ana tjetër, eurokomisari për zgjerim, Oliver Varheji pas publikimit të raporteve për progresin e dy vendeve tha se Komisioni Evropian qëndron fuqimisht në rekomandimet e tij për hapje të bisedimeve me Maqedoninë e Veriut dhe me Shqipërinë.