Regjistrimi i popullsisë në Serbi, Berisha: Vuçiç, projekt për dëbimin e shqiptarëve

Kryetari i Partisë Demokratike, Sali Berisha u ka bërë thirrje shqiptarëve në Serbi, që të marrin pjesë në procesin e regjistrimit të popullsisë.

Në një deklaratë për mediat jashtë ambienteve të Kuvendit, Berisha akuzoi presidentin serb, Aleksandër Vuçiç se ka ndjekur politika për të dëbuar shqiptarët nga trojet e tyre.

“Një thirrje vëllazërore, për të gjithë shqiptarët e Luginës së Preshevës, komunave të Preshevës, Bujanocit dhe Medvegjës, por edhe të gjithë shqiptarëve në Serbi, të marrin pjesë në regjistrimin që po bën kjo republikë. Po bën një regjistrim problematik dhe ka bërë gjithçka, Vuçiç me të gjitha politikat që ka ndjekur, të zvogëlojë artificialisht popullatën shqiptare në trevat e veta mijëvjeçare në Luginën e Preshevës.

Format e përdorura nga serbomadhi Vuçiç, për të çregjistruar banorët e këtyre komunave, nga trojet e tyre shekullore, janë unike në botë. Njëra prej të cilave, mjafton që postieri të trokasë në derë dhe të mos i hapë kush derën, ajo familje çregjistrohej. Kjo duhet të marrë vetëm një përgjigje, regjistrimin e të gjithë shqiptarëve kudo që ndodhen, në Republikën e Serbisë, Evropë, SHBA, kudo”, theksoi Berisha.

LEXONI GJITHASHTU

• Kurti fton shqiptarët që jetojnë në Serbi t’i përgjigjen regjistrimit të popullsisë
• Nesër nis regjistrimi i popullsisë në Serbi, thirrje shqiptarëve të marrin pjesë