Rigjallërohet pylli i fazanëve, atraksioni i veçantë turistik në Korçë tërheq vizitorë vendas e të huaj

Një atraksion i veçantë turistik në juglindje të Shqipërisë, dhjetë kilometra larg qytetit të Korçës, i lënë në hije për vite me radhë, po rijetëzohet pak e nga pak. Një nga zonat më të gjelbëruara me pyje halorë, po shton rreth 50 fazanë me qëllim mbarështimin e tyre.

Të shumtë janë vizitorët të cilët preferojnë të kalojnë disa orë në fundjavë në këtë zonë.

“Vijmë shpesh herë, kur kemi pushim, është vend i bukur dhe i freskët,” – tregon një qytetar.

“Vij çdo të diele,” – shprehet një zonjë, “vend i veçantë dhe i pastër” – thotë një tjetër.

Krijesa e hijshme me orgjinë të lashtë që është kthyer në simbol të këtij pylli, nuk është i vetmi investim për kthimin e gjallërisë.

“Pylli është pasuruar gjithnjë e më shumë, duke filluar që me rikthimin e fazanëve dhe kaprojve dhe me pasurim tjetër të botës shtazore,” – thotë Stiljan Belishta, këshilltar i kryebashkiakut Sotiraq Filo.

I njohur jo vetëm për bimësinë e egër dhe faunën e larmishme, pylli ofron një pamje piktoreske, duke u kthyer në një potencial turistik për zhvillimin e zonës.

“Vizitorët mund të gjejnë freskinë dhe oazin e bukur që krijohet pasi pylli i fazanëve në perëndim laget nga lumi Dunaveci dhe në pjesën veriore laget nga lumi i Devollit, karakteristika këto që i japin pyllit atraksion turistik,” – shton më tej Belishta.

Pylli është nën administrimin e Agjencisë së Zonave të Mbrojtura pranë Ministrisë së Mjedisit dhe shpesh mban aktivitete të ndryshme për argëtimin e turistëve shqiptarë dhe të huaj.