Rrugëtim për në Vermosh skajin më verior të Shqipërisë

Veriu i Shqipërisë është njohur vitet e fundit për zhvillimin e vrullshëm të turizmit malor. Ndër vendet që janë kthyer në destinacionet kryesore është edhe Malësia e Madhe me pika tejet interesante si Tamara, Lëpusha dhe Vermoshi.

Këto destinacione vizituan në episodin e radhës “Udhëtarët” Loneta Progni dhe Renaldo Salianji duke sjellë edhe aspekte të veçanta për to.

• “Udhëtarët” nisin rrugëtimin e parë nga “djepi i kulturës”, Shkodra

Pasi eksploruan Shkodrën dhe rrethinat e saj, ku treguan disa nga vendet që duhen vizituar me patjetër, “Udhëtarët” vijuan për në skajin më verior të Shqipërisë.

• “Udhëtarët” eksplorojnë të veçantat e rrethinave të Shkodrës

Me një rrugë piktoreske me gjarpërime që të bëjnë të shohësh madhështitë e maleve përreth “Leqet e Hotit” janë bërë popullore për ballkonin e xhamit ku të gjithë nuk largohen pa shkrepur një fotografi.

Prej andej destinacion interesant është “Lumi i Cemit”, që bën bashkë burimet nga malësia përreth. Nga fakti se rrjedh nga burime të larta temperatura e ujit është shumë e ftohtë – rreth 3-4 gradë celsius, – megjithatë për të pasionuarit pas notit mund ta provojnë dhe një zhytje.

Fshati i Tamarës është një pikë tërheqëse me infrastrukturë të zhvilluar pritëse si bujtina, lokale dhe restorante.

• Tamara, një thesar bukurie në Malësinë e Madhe

Rrugëtimi për në Lëpushë kalon mes kanioneve të Selcës, të cilat gjithashtu ofrojnë një peizazh fantastik.

“Udhëtarët” gjatë rrugëtimit të tyre për në Lëpushë ndeshën me një grup turistësh nga Gjermania, të cilët prej rreth një jave ishin duke vizituar Shqipërinë.

Ndryshe nga peizazhi i rrugëtimit mes kanioneve të Selcës, fshati i Lëpushës është i rrethuar me gjelbërim teksa spikasin shtëpitë karakteristike me punime guri. Në Lëpushë ka gjithashtu një lum dhe një ujëvarë.

• Potenciali turistik i dy fshatrave më të skajshëm të Shqipërisë, Lëpusha dhe Vermoshi

Ngjashëm me shtëpi guri dhe gjelbërim është edhe Vermoshi, zona më veriore e Shqipërisë. E gjithë zona njihet për qëndresën përballë pushtuesve në periudha të ndryshme.

Një pikë interesante që nuk duhet humbur është gjithashtu “Shtëpia mbi qershi” e cila në periudhën e verës është nga më të bukurat në zonë. Vizitorët mund të konsumojnë specialitetin e shtëpisë, raki qershie.