Shkodër, biznesi në vështirësi, falimentojnë mbi 2 mijë sipërmarrje të vogla, taksat e papërballueshme

Një nga sektorët më të goditur nga pandemia është biznesi i vogël, i cili pavarësisht ndihmave të qeverisë në të shumtën e rasteve ka shkuar drejt falimentit.

Bizneset në Shkodër kanë pësuar humbje të mëdha dhe shume prej tyre kanë ulur qepenat për të mos i ngritur më.

E tillë është situata në tregun e veshjeve. Një vit më parë ky treg ka qenë i tej-mbushur nga blerësit, ndërsa tani shumica e bizneseve janë mbyllur .

Fiqiret Kaca tregtar prej vitesh shprehet se situata e biznesit është përkeqësuar.

Vështirësive të pagesave të taksave të larta tashmë i është shtuar dhe situata e pandemisë.

“Konsumi, xhiroja… kanë rënë vazhdimisht, taksat dhe tarifat janë rritur, ose duke u hequr një më e vogël duke u shtuar një më e madhe, na e kanë vështirësuar jetesën pasi jemi dhe kryefamiljarë dhe me këtë punë jetojmë,” – u shpreh Kaca.

Sipas kreut të sindikatave të pavarura në Shkodër Albert Tuka, rreth 40 % e biznesit të vogël ka falimentuar por dhe pjesa tjetër është drejt asaj rruge për shkak të mungesës së fuqisë blerëse.

“Janë rreth 4,500 biznese të vogla, prej së cilave gjysma janë mbyllur prej pandemisë dhe taksave, fuqia blerëse ka rënë prej pandemisë por dhe për shkak të politikave jo të duhura të qeverisë,” – u shpreh kryetari i sindikatës Tuka.

Referuar shifrave nga drejtoria e Tatimeve, më shumë se 2 mije biznese të vogla në qytetin e Shkodrës kanë kaluar në status pasiv.