Shkollat në Shkodër me tre turne, kërkohet shtim i numrit të mësuesve

Mbi 18,000 nxënës në sistemin publik dhe atë privat kanë nisur vitin e ri shkollor në bashkinë Shkodër, nën masa të rrepta sigurie si shkak i COVID-19.

Në të gjithë hyrjet e institucioneve arsimore pati persona të cilët matën temperaturën e nxënësve dhe i udhëzuan të ruajnë distancën e sigurisë.

Për gjimnazistët përshtatja ishte më e lehtë, ndonëse zhvillimi i mësimit me maskë krijon vështirësi tek ata.

“Masat janë pak të vështira për t’u zbatu, si siç është mbajta e maskës. Kjo gjë është e vështirë pasi ka momente që të pengon frymëmarrjen e lirshme”, thotë një prej gjimnazistëve.

Albana Bushati, drejtore e shkollës së mesme “28 Nëntori”, shprehet se po zbatohen të gjithë protokollet e sigurisë si dhe janë krijuar klasa me numër të reduktuar nxënësish.

“Përgjegjësi i dezhurnit bashkë me një prej nën drejtorëve bën hyrjen në bazë të rregullave të nxënësve. Jemi duke u munduar maksimalisht të respektojmë çdo rregull të vendosur për të ruajtur shëndetin e nxënësve dhe shëndetin tonë”, tha znj. Bushati.

Shtimi i klasave ka bërë që të rritet numri i orëve për mësuesit. Aktualisht, këto orë shtesë po përballohen nga mësuesit aktualë, ndërsa është kërkuar shtimi i personelit mësimor nga drejtoria e arsimit në Shkodër.

Më problematike paraqitet situata në shkollat fillore dhe 9-vjeçare. Mësimi me turne si dhe frika e infektimit ka krijuar jo pak shqetësim te prindërit. Pavarësisht masave të marra, mbetet problematik grumbullimi i prindërve dhe fëmijëve në hyrje të shkollave.

“Mundohemi me i respektu masat. Frika është për të gjithë”, thotë një e moshuar teksa shoqëron mbesën në shkollë.

Në bashkinë Shkodër në 3 shkolla po zhvillohet mësimi me 3 turne, në 20 të tjera me 2 turne ndërsa në pjesën tjetër mësimi po vazhdon me një turn. Dy mësues janë identifikuar me COVID-19 para fillimit të vitit të ri shkollor, dhe është bërë zëvendësimi nga drejtoria vendore e arsimit ndërsa priten përgjigjet edhe për 5 mësuese të tjera që kanë bërë analizën.

Lexoni gjithashtu:

Prindërit kërkojnë orare më të zgjatura në shkolla, s’kanë besim tek masat

Kolonjë, pastruesja e shkollës rezulton me Covid, izolohen 10 mësues

Frika dhe paqartësia ndaj masave anti-COVID tek fëmijët, psikologia: Çelësi i suksesit janë prindërit