Prej 19 majit deri më 1 qershor, Shqipëria do të presë kampionatin evropian të 17-vjeçarëve, një ngjarje e rëndësishme që zhvillohet për herë të parë në vendin tonë.
Ky kompeticion vjen si një tjetër sfidë pas finales së parë të Conference League. Kreu i FSHF-së, Armand Duka, e ka cilësuar këtë zgjedhje të UEFA-s si një shenjë besimi nga institucionet evropiane.
“Shoh dhe perspektivën e futbollit, gjithë këta fëmijë që kanë mbushur fushën. Sot, në një lloj mënyre, ne fillojmë zyrtarisht këtë aktivitet të rëndësishëm, Kampionatin Evropian U-17. Ky është një event shumë i rëndësishëm për Shqipërinë, që konfirmon edhe njëherë aftësitë organizative të Shqipërisë dhe të futbollit shqiptar. Po ashtu, konfirmon besimin që institucionet evropiane kanë për ekspertizën tonë dhe përvojën tonë në organizimin e eventeve madhore”, tha Duka.
Për realizimin e këtij kompeticioni është ndërtuar infrastruktura e duhur.
“Për të arritur në organizimin e tij, si Federatë mund të themi se jemi një entitet i mesëm apo modest, por ka qenë e nevojshme një punë voluminoze për përgatitjen e katër stadiumeve që tashmë janë gati: ‘Arena Kombëtare’, ‘Elbasan Arena’, ‘Arena Egnatia’, dhe ‘Niko Dovana’, si dhe 10 fusha stërvitjeje. Të gjitha këto janë pjesë e një pune të madhe që ka kërkuar përpjekje të jashtëzakonshme”, shtoi Duka.
Përveç sportit, Kampionati Evropian i 17-vjeçarëve pritet të sjellë edhe një numër të konsiderueshëm tifozësh në Shqipëri.
LEXONI GJITHASHTU:
- UEFA| Mini-turnetë e Kampionatit Europian U-17 dhe U-19 do të zhvillohen në Shqipëri
- UEFA vendos që Kampionati Europian 2025 U-17 të mbahet në Shqipëri