Tamara, një thesar bukurie në Malësinë e Madhe

Rreth 64 kilometra në veri të Shkodrës ndodhet një prej pikave më tërheqëse të turizmit në Shqipëri, Tamara.

E gjendur në zonën e Malësisë së Madhe në rrugën Shkodër-Vermosh, e cila mund të përshkohet lehtësisht me makina, Tamara ofron disa prej peizazheve më interesante të veriut të Shqipërisë.

Këtë zonë e eksploruan në serinë e radhës “Udhëtarët” Loneta Progni dhe Renaldo Salianji duke sjellë në pah dhe pikat më interesante të saj si “Leqet e Hotit”, apo “Lumi Cemit”.

“Leqet e Hotit” me një ballkon prej xhami të vendosur në lartësinë prej rreth 700 metrash ofrojnë një pamje marramendëse. Për këtë zona është kthyer në pikë referimi për gjithë turistët që e frekuentojnë atë.

Prej “Leqeve të Hotit” mund të shihet qartë dhe bukuria e “Lumit të Cemit” rreth 500 metra më tutje.

Lumi i Cemit buron nga malësia e Kelmendit dhe ka një temperaturë tejet të ulët – rreth 3-4 gradë celsius, – megjithatë për të pasionuarit pas notit është e mundur të bëhen zhytje.

Cemi vijon përtej territorit shqiptar për në Malin e Zi ku bashkohet me lumin Moraca në jug të Podgoricës.

Malësia përreth është e përshtatshme për të pasionuarit e ngjitjeve në male. Në fakt, vitet e fundit zona është bërë pikë referimi për turistë të huaj të cilët i nisin ngjitjet nga vargmalet Dinarike dhe përfundojnë në Luginën e Valbonës.