“U përgjak dita e parë e shkollës”, flet Myftiu i Shkodrës: Dënojmë dhunën

Kamera e emisionit “Review” ishte në Shkodër, ku gazetarja Greta Topjana i mori një intervistë ekskluzive Myftiut të Shkodrës, Muhamed Sytarit, lidhur me ngjarjet kriminale të ditëve të fundit në këtë qytet.

Ai u shpreh se Shkodra është një qytet i bekuar nga Zoti, por fatkeqësisht dita e parë e shkollës, një ditë gëzimi për fëmijët dhe prindërit, këtë vit u përgjak dhe u prish gëzimi i tyre.

Ai theksoi se kur prishen ekuilibrat e së mirës, qetësisë dhe harmonisë në Shkodër, askush nuk është i kënaqur.

“Ne dënojmë aktet e dhunës dhe prapësitë, nga kushdo qofshin dhe kudo qofshin. Në Kuran thuhet: ‘Kush vret një person, është sikur të ketë vrarë gjithë njerëzimin, dhe kush shpëton një jetë, është sikur të ketë shpëtuar gjithë njerëzimin’”, tha Myftiu i Shkodrës.

Myftiu shprehu dhembshurinë për çdo nënë që ka humbur fëmijën dhe tha se zemrat na digjen për këtë.

“Ne lutemi për çdo të mirë dhe punojmë për të mirë. Dënojmë dhunën, vjedhjet dhe çdo akt që është i dënueshëm nga Zoti. Ne duhet të thërrasim sërish drejt asaj ku është bekimi i Zotit. Duhet të flasim, të mos heshtim, duhet të ngremë zërin për të ruajtur ekuilibrin dhe vlerat e mira që na kanë lënë të parët tanë,” tha ai.

Myftiu shtoi se njeriu mund të jetë i lirë, por liria absolute shkatërron dhe e kthen njeriun në egërsirë, siç po shohim dhe dëshmojmë sot. “Liria absolute prish ekuilibrat”, tha ai.

LEXONI GJITHASHTU:

• Myftiu i Shkodrës: Të futet edukata fetare si lëndë në shkolla, të mësojmë për Zotin
• Kur të fortët bëhen model, Dom Mark Pashkja flet për atentatin në zemër të Shkodrës