Viti i ri shkollor nis me ndalim të telefonave në klasë, çfarë masash parashikohen

Ky vit i ri shkollor nis me rregulla më strikte për përdorimin e telefonave. Nxënësit duhet t’i dorëzojnë aparatet te mësuesit kujdestarë përpara fillimit të mësimit.

Nëse kapen duke i përdorur gjatë orës, do të përballen me masa ndëshkuese, deri në penalizim nga mësimi.

Ndëshkimet janë të ndara sipas shkallës së shkeljes. Shkelja e parë parashikon vërejtje për nxënësin dhe njoftim të prindërve.

Në rastin e dytë, telefoni mbahet për një periudhë të caktuar. Ndërsa në rast përsëritjeje, masat mund të shkojnë nga ulja e notës së sjelljes deri te pezullimi i përkohshëm nga mësimi.

“Mendoj se pasja e telefonit gjatë orës së mësimit sjell probleme, jo vetëm për mësuesit që e kanë të vështirë të mbajnë nxënësit të përqendruar, por shpërqendron edhe të tjerët në klasë. Edhe më parë ka qenë e ndaluar, por nuk ka dhënë rezultat. Do të ishte më mirë të gjendeshin metoda të tjera, sepse nuk besoj se kjo do të funksionojë,” – thotë Nevruz Kaptelli nga Sindikata e Pavarur e Arsimit.

Ligji i ri prek nxënësit e shkollave 9-vjeçare dhe gjimnazeve. Përjashtim bëjnë vetëm ata që kanë probleme shëndetësore, rast në të cilin prindi njofton drejtorinë. Në këto raste, telefoni i fikur qëndron në shkollë dhe i dorëzohet nxënësit vetëm pas përfundimit të orarit.

Çdo klasë do të ketë një kuti të posaçme për ruajtjen e celularëve.

Edhe për mësuesit dhe drejtuesit e shkollave janë parashikuar ndëshkime, nëse nuk zbatojnë udhëzimin e ri.

Ky vit i ri shkollor nis me rregulla më strikte për përdorimin e telefonave. Nxënësit duhet t’i dorëzojnë aparatet tek mësuesit kujdestarë përpara fillimit të mësimit. Në të kundërt, ata që kapen duke përdorur telefonin do përballen me masa ndëshkuese deri në penalizim nga mësimi pic.twitter.com/LzOup3Od1J

— Euronews Albania (@EuronewsAlbania) September 2, 2025

LEXONI GJITHASHTU:

• Përdorimi celularit në makinë i bën “gjëmën”, kapet në Tiranë i kërkuari nga Spanja
• Vodafone & AST SpaceMobile krijojnë kompaninë satelitore për shërbim celular