‘Zëvendësimi i Yuri Kim’, Mediu: Njoftim i nxituar, të sillemi si aleatë me SHBA-të

Kryetari i Partisë Republikane, Fatmir Mediu e konsideron të nxituar dhe jo normale, njoftimin e Ministrisë së Jashtme, ku thuhej se ka nisur procedura për zëvendësimin ambasadores amerikane, Yuri Kim.

Në një intervistë për Euronews Albania, Mediu u shpreh se kohën e punës së një ambasadori e përcakton vendi përkatës, nuk e përcakton Minsitria e Jashtme.

Sipas tij, Shqipëria duhet të sillet si vend aleat me SHBA-të dhe jo vetëm të kërkojmë aleancë prej tyre.

“Kohën e punës së një ambasadori e përcakton vendi përkatës, nuk e përcakton Minsitria e Jashtme. Sjellja e Ministrisë së Jashtme, në rastin konkret, ka qenë një sjellje jo normale, e nxituar dhe padyshim krijon pikëpyetjet e veta. Ambasadorja Yuri Kim përfaqëson SHBA-ve dhe çdo qëndrim i SHBA-ve reflektohet në qëndrimet e ambasadës.

Prandaj, ne nuk duhet të hyjmë te ideja e personalizimit të marrëdhënieve, padyshim që edhe karakterët, edhe mënyra se si sillen ambasadorët kanë vendin e vet në zhvillimin e marrëdhënieve ndërmjet dy palëve. Por duke pasur në konsideratë faktin që SHBA-të janë partnerë strategjikë dhe ne i detyrohemi kaq shumë, është mirë që ne të sillemi ne si aleatë me ta, jo vetëm duke kërkuar aleancë prej tyre”, theksoi ai.

Ambasadorja e SHBA, Yuri Kim iu përgjigj diskutimit lidhur me mandatin e saj, duke theksuar se do të jetë ‘edhe ca më gjatë në Shqipëri’.

Në konferencën “Drejt ekselencës gjyqësore”, Kim u shpreh se shqiptarë po i ndiejnë rezultatet e reformës në drejtësi, por inkurajoi për më shumë.

 

 

Sipas ambasadores, me gjithë progresin e arritur, nuk është koha për të thënë ‘mjaft’ dhe për të pushuar, por për të punuar më shumë.

LEXONI GJITHASHTU

• Genc Burimi zbulon dokumentin që Yuri Kim dërgoi në SHBA për Ramën
• Reagimi i ministrisë për Yuri Kim, Ndoka: Provokues dhe i tepërt
• “Do jem këtu edhe për ca më gjatë”, ambasadorja Kim i përgjigjet qeverisë