Zvezda pa ujë prej 30 vitesh, banorët dyshojnë për cilësinë e ujësjellësit të ri

Banorët e fshatit Zvezdë, në Bashkinë Maliq, kanë dalë sot në protestë për të denoncuar mungesën prej 30 vitesh të ujit të pijshëm.

Ata shprehen të pakënaqur me punimet që po kryhen aktualisht për ndërtimin e një ujësjellësi të ri, duke i cilësuar ato si të paorganizuara dhe pa cilësinë e duhur.

Sipas banorëve, projekti nuk është duke u zbatuar sipas standardeve, çka ngre dyshime se, edhe pas përfundimit të tij, fshati mund të mbetet sërish pa ujë.

Ata nënvizojnë se problemi kryesor i zonës mbetet mungesa e kanalizimeve të ujërave të zeza, e cila sipas tyre duhet të ishte trajtuar si prioritet përpara çdo investimi tjetër.

Banorët shprehen të revoltuar edhe për mungesën e reagimit nga autoritetet vendore.

Sipas tyre, asnjë përfaqësues i bashkisë nuk ka shkuar në fshat për të dëgjuar shqetësimet e komunitetit, duke lënë në pikëpyetje fatin e një investimi që, siç thonë ata, rrezikon të mbetet gjysmak dhe joefikas.