Duka pas takimit me Berishën: Të gatshëm që të dalim me kandidatë të përbashkët

Kreu i Partisë Agrare Ambientaliste Agron Duka, pas takimit me Sali Berishën dhe aleatët, u shpreh se është i gatshëm që të dalin me kandidatë të përbashkët në zgjedhjet vendore.

“Zoti Berisha e mirëpriti idenë tonë, u duk i gatshëm. Natyrisht e mirëpriti parimisht dhe tha se do të diskutojë më parti të tjera jo parlamentare dhe më në fund të vendosin se cilat do të jenë modalitetet. Ky ishte rezultat i takimit me Berishën, m’u duk i gatshëm që të bashkëpunojë. Këtë kemi dëgjuar nga z. Meta, i cili është shprehur se jemi të gatshëm të dalim me një kandidaturë të përbashkët e gjithë opozita. Nëse do tentojmë të dalim me dy kandidatura, është gjë që ndodhi në 6 mars dhe mund të dështojmë. Ne po themi që kandidatë të ndryshëm të partive opozitare të mund të konkurrojnë në mënyrë të lirë nëpërmjet sondazheve. Primaret e Berishës janë për të dalë kandidatët brenda partisë”, u shpreh ai.

Këtë të enjte, kryetari i PD, Sali Berisha zhvilloi një takim me kryetarin e Partisë Republikane, Fatmir Mediu; kryetarin e Partisë së të Drejtave të Njeriut, Vangjel Dule; kryetarin e Partisë Agrare-Ambientaliste, Agron Duka dhe kryetarin e Lëvizjes për Zhvillim Kombëtar, Dashamir Shehu.

Në këtë takim u diskutua për bashkëpunimin për zgjedhjet e ardhshme vendore.

LEXONI GJITHASHTU:

• ‘Martinajn e lajmëruat 5 minuta para’, Salianji-Çuçit: Ju kanë ikur kriminelë
• ‘Vettingu, i domosdoshëm’, Çuçi: Urgjente të riorganizojmë Policinë Kriminale
• Ministria e Mbrojtjes kërkon 7 specialistë në fushën e mbrojtjes kibernetike