Kryemadhi për inceneratorët: Klodian Zoto ka paguar 2 mld lekë për 19 kompani

Deputetja e Partisë së Lirisë, Monika Kryemadhi ka publikuar fakte të reja, të cilat sipas saj, faktojnë aferën korruptive për inceneratorët.

Në një deklaratë për mediat, Kryemadhi u shpreh se Klodian Zoto ka paguar rreth dy miliardë lekë për 19 kompani, midis të cilave Lumi-06, Elvis 03 Group dhe Elvis Co.

Sipas saj, vlera e grabitur shkon në rreth 19 milionë dollarë dhe shtoi se këto pagesa, Zoto i ka bërë gjatë viteve 2018-2021.

“Klodian Zoto ka paguar rreth 2 miliardë lekë për 19 kompani. Ajo që të bën përshtypje janë Lumi-06, Elvis 03 Group dhe Elvis Co. Vlera e grabitur shkon rreth 19 milionë dollarë. Këto pagesa Klodian Zoto i ka bërë në vitin 2018-2019-2020-2021. Ndërkohë që dje kryeministri thoshte që janë paditur nga Drejtoria e Tatimeve. Kur janë paditur si i kanë lejuar të paguhen dhe të marrin paratë?

Rama ka bërë presion ndaj prokurorisë për të mos vazhduar hetimet për inceneratorin e Tiranës. Elbasani dhe Fieri u sekuestruan kur u mbyllën të gjitha pagesat. Të njëjtat kompani që kanë kryer skemën tek inceneratori i Elbasanit dhe Fierit, janë dhe tek Inceneratori i Tiranës”, theksoi ajo.

LEXONI GJITHASHTU

• Këlliçi: Nëse zgjidhem kryebashkiak, do dërgoj Veliajn në SPAK për inceneratorin
• Gazment Bardhi në SPAK: Ka përparime në hetimet për inceneratorin e Elbasanit
• ‘Na hiqni akuzën ose do flasim’, Berisha: Rama po kërcënohet për inceneratorët