‘Protestën e kërkuan njerëzit’, ish-deputetja e PL-së: Është vetëm fillimi

Ish-deputetja e Partisë së Lirisë, Silva Caka thotë se protesta e sotme e opozitës, u kërkua nga njerëzit, pas takimeve të shumta në terren.

Në emisionin “Review” në Euronews Albania, Caka tha se ky ishte vetëm fillimi dhe shtoi se do ketë protesta e aksione të tjera opozitare.

“Terreni është filluar që para muajve të verës. Protesta nuk erdhi se duhej bërë, protesta erdhi sepse është kërkuar, sepse njerëzit kanë pakënaqësitë e tyre dhe shumë problematika gjatë takimeve në terren.

Sot u solidarizuan dhe ishin pjesë e asaj proteste. Ky është vetëm fillimi, do të ketë aksione nga më të ndryshme, protesta, padi, denoncime, çfarëdo lloj gjëje që e përmban vetë opozitarizmi në tërësi, theksoi ajo.

Pas më shumë se dy orësh, përfundoi protesta kombëtare e opozitës. Në protestë pati 20 folës, ndër to kryedemokrati, Sali Berisha dhe kreu i Partisë së Lirisë, Ilir Meta.

Të dy liderët, hodhën akuza në drejtim të kryeministrit Edi Rama, për shpopullimin e vendit, situatën ekonomike dhe korrupsionin.

Protesta, pas përfundimit të saj, u shoqërua me incidente. Gjithçka filloi pasi Berisha mbaroi fjalën e tij dhe protestuesve iu bë thirrje për të ndezur qirinj në shkallët e Kryeministrisë, në nder të personave që kanë humbur jetën në përplasjet me policinë.

Protestuesit çanë kordonin e policisë dhe hynë në oborrin e Kryeministrisë, ku hodhën bojë në dyert dhe dritaret e godinës.

LEXONI GJITHASHTU

• Dy të shoqëruar pas incidentit në protestë, të rinjtë çanë kordonin e policisë
• Përfundon protesta: Berisha-Meta akuza Ramës, protestuesit çajnë kordonin e policisë
• Protestuesit hedhin bojë në dritaret dhe muret e Kryeministrisë