Taulant Balla në përgjimet e Çapjave? Gazetari Lita zbulon detajet

Ardian Çapja i akuzuar për vrasjen e Gentian e Nezir Beqirit në vitin 2012 ka dhënë sqarime në Gjykatën e Posaçme në lidhje me ngjarjen e 10 viteve më parë.

Në seancë ai lëshoi akuza në drejtim të një politikani me emrin Taulant, që sipas tij ka qenë në përgjim për masakrën e 3 shkurtit të 2016-tës, ku kanë mbetur të vrarë antarë të fisit Çapja.

Lavdrim Lita, drejtor i portalit Faktor.al tha në një intervistë për Euronews Albania se pas ekzekutimit policia ka vënë në përgjim dhe deputetin Taulant Balla në një nga numrat e tij dhe nuk dihet pse.

“Kjo tashmë është e konfirmuar. Vetë zoti Balla nuk ka reaguar, ka ndjekur një linjë heshtje, kjo për shkak të një loje që bëhet me faktin se në 2016-tën prokuroria në përgjithësi nuk mund të vinte në përgjim deputetët e Republikës së Shqipërisë, pasi nuk kishin ndodhur akoma ndryshimet në ligjin e SPAK,” – u shpreh Lita.

Ai tha se arsyeja pse gjykata ka refuzuar të vijojë me përgjimin dhe me asgjësimin e serverit është sepse ligji nuk e lejonte atëherë që deputeti të përgjohej pa autorizimin e Kuvendit.

“Pra, prokuroria dhe policia ishin në shkelje të ligjit, në shkelje të ligjit ishte dhe gjykata që e kishte lejuar. E ka korrigjuar brenda 48 orëve këtë gjë sepse e kanë kuptuar që kanë bërë një gafë juridike, pavarësisht se KLD-ja apo zyrtarët e prokurorisë nuk kanë marrë masa për këto gafa,” – u shpreh Lita.

LEXONI GJITHASHTU:

• Mesazhet e koduara të Ardian Çapjas para gjykatës, gazetari tregon detaje
• ‘Politika teatër luftërash”, Softa: Dëshmia e Çapjas të hetohet me seriozitet